admin
Charity Moyo
KUDABA oluyimpicabadala esigabeni seMataga eMberengwa kulenina elitshade lendodana yalo andubana lizivikele kusenzo salo lesi esilihlazo ngokuthi lidla izithukuthuku zalo.
UBetty Mbereko (40) owabhujelwa ngumkakhe kuminyaka elitshumi lambili edluleyo wethuse omakhelwane ngokuzithwala isisu sendodana yakhe uFarai Mbereko (23).
Kubikwa ababili laba sebeleminyaka emithathu bephila njengezithandani. Ababili laba badonselwe emthethwandaba wenduna uNathan Muputirwa ngoLwesithathu ngeviki ephelileyo njalo abazange bathande ukuchitha isikhathi senkundla ngoba bavele bavuma ukuthi bayathandana njalo bazimisele ukuthi batshade.
Umfakazi oqotho uMnumzana Daniel Shumba owayekhona mhla kuthoniswa icala lokuthandana kukaBetty lendodana yakhe, uFarai uthe inina leli alizisoli ngitsho lakancane ngesenzo salo.
“UBetty waqinisa ikhanda engelanhloni ngitsho watshela abantu ababethe gwaqa enkundleni wathi yena wazondlela yedwa umntanakhe kungelamuntu omncedisayo.
“Wathi okusihluphayo kuyini njengoba kungazange kusihluphe kudala esadubeka lomntanakhe,” kutsho uMnu Shumba.
Uqhubekele phambili wathi uBetty waveza ukuthi abantu abamekele azidlele imali yomntanakhe bangazihluphi ngobudlelwano obuphakathi kwakhe laye.
Omunye umfakazi ongathandanga ukuqanjwa ngebizo uveze ukuthi uFarai wabamangalisa ngoba laye wathi uzimisele ukuthatha unina lokumlobola.
“UFarai watshela inkundla ukuthi uyise wabhubha engaqedanga ukulobola unina kungakho uzimisele ukuba aqedise amalobolo,” kutsho lumfakazi.
Kuzwakale ukuba waphinda watshela abantu ukuba umthwalo othwelwe ngunina ngowakhe kungakho abantu bangamcabangeli ukuthi uyisifebe.
Kubikwa induna uMuputirwa ithe ayingeke ivumele ihlazo elingaka lisenzakala esigabeni sayo kungakho izabaxotsha esigabeni. Induna le kubikwa yengezelele yathi ngabe kukudala ababili laba bekumele babulawe ngoba abakwenzayo kulihlazo.
Kusenjalo kuzwakale ukuthi ababili laba balile ukwehlukana bethi bazakwehlukaniswa yikufa kungakho bakhethe ukuthi basuke esigabeni senduna le. Imizamo yokukhuluma lababili laba yehlule.
Online Reporter