Online Reporter
YiNtatheli kaMthunywa
KUDABA olutshwaqisa umzimba, kulenina elileminyaka engu-19 yokuzalwa lesiqintini seMakwika eHwange elitholakale lilecala lokutshisa umkalo ngamanzi abilayo isitho sangasese ngesikhathi lithukuthele ligane unwabu ngenxa yemilayezo esolisayo kumakhalekhukhwini walo.
Ukuhlasela ngesihluku, okwatshiya umkakhe kunye lomakhelwane belimele kakubi, kwenzakala mhlaka 2 Nhlangula ngo 2025.
Ngokutsho kweNational Prosecuting Authority of Zimbabwe (NPAZ), kubikwa inina leli, “latshaya umkalo ngempama, lambamba isitho sangasese, lamdonsela emkulwini, lamthela ngamanzi abilayo okwabangela ukuthi ayobuke.” Wagijinyiselwa esibhedlela, udaba lwabikelwa amapholisa eHwange.
“Umakhelwane okhathazekile wazama ukungenela laye kodwa watshiswa ngamanzi abilayo esifubeni njalo laye ulalisiwe esibhedlela,” kutsho isitatimende seNPAZ.
Umsolwa utholakale elamacala amabili — elokuhlukuluza kunye lelokutshaya. Ugwetshelwe ukuyapika inyanga ezingu-12 ngecala lodlame lwasekhaya. Ecaleni lokutshaya, ugwetshwe inyanga ezingu-24, kodwa wephulelwa inyanga ezingu-12 kukhangelelwe ukuthi engadali icala elifanayo kuminyaka emihlanu elandelayo. Inyanga ezingu-12 eziseleyo lazo zibuye zalengiswa kukhangelelwe ukuthi asebenzele umphakathi amahola angu-630.
I-NPAZ isole ukuhlasela okulolunya:
“Udlame ekhaya noma emphakathini alwamukelekile. Umthetho usebenza ngokulinganayo kubo bonke, futhi abephula umthetho bazajeziswa.”
“Ukuhlukunyezwa kwasekhaya akuyona inkinga yabesifazane kuphela kodwa noma ngubani angahlukuluzwa.
Ukuthukuthela kayisiso sizatho sokudala icala. Khetha ukuthula,” kutsho isitatimende lesi.
