Online Reporter
Innocent Kurira
ULYNOTH Chikuhwa kubikwa usebizwe esibayeni sikaJoey Antipas kuChicken Inn.
Umdlali lo, obesengwalweni zeqembu leScottland, kubikwa loba nini, kusukela lamuhla, uzabe esevumelane lamaGamecocks njalo engadlala kuleliqembu kumdlalo walo leFC Platinum ngoMgqibelo, ngokutsho kwabafakazi abaqotho abancwebe intatheli yeZimpapers Sports Hub indlebe.
“Kusele ukuqedisa isivumelwano kuphela. Iqembu limfuna ngabomvu njalo lumdlali uyakuthakazelela lokhu. Sikhangelele ukuthi kwenzakale kumalanga ambalwa alandelayo. Akumangalisi ukuthi adlale ngoMgqibelo,” kutsho omunye wabafakazi bodaba.
UChikuhwa, oleminyaka yokuzalwa engu-30, wahlohla amabhola ukwedlula bonke abadlali kuCastle Lager Premiership nyakenye, egaxe entanjeni angu-17, edlalela iHighlanders. Ekufikeni kwakhe kuScottland kazange athole inhlanhla nanko usehlohle elilodwa zwi.
Laseqenjini alidlalelayo ukhuhla ibhentshi kumidlalo eminengi. Mhlawumbe ngokubizwa ngu-Antipas angathola indawo.
Kodwa, umqeqetshi weChicken Inn lo uthe ebuzwa ngamalungiselelo wokusayina uChikuhwa uthe kakakhululeki ukukhuluma ngalumdlali ngoba kusemasinyane.
“Kusemasinyane ukukhuluma ngoChikuhwa. Bakhona abadlali abazabuya eqenjini,” kutsho lumqeqetshi engafuni ukuqhubeka ngokunengi.
Ifasitela lokuthengwa lokuthengiswa kwabadlali livulwe mhlaka 1 kusiya kumhlaka 31 Ntulikazi.
Kusenjalo, imidlalo yePSL iyaqhubeka kulimpelaviki
Esadalalayo iDynamos, iqondana leTelOne enkundleni ye-Ascot, eGweru. IHerentals idlala leSimba Bhora eRufaro. Ezisesiqongweni selogu iMWOS zidlala labafana besikolo iHerentals.
NgeSonto, umqeqetshi uTry Ncube uzaphinda ukuzama ukuthi anqobe okwakuqala iHighlanders idlala leGreenfuel enkundleni yeBarbourfields.
Imidlalo yeCastle Premier Soccer League ngempelaviki:
NgoMgqibelo: Herentals v Simba Bhora (Rufaro), TelOne v Dynamos ( Ascot), ZPC Kariba v Manica Diamonds ( Nyamhunga), FC Platinum v Chicken Inn (Mandava), Yadah Stars v MWOS (Heart), Bikita Minerals v Kwekwe (Gibbo), Ngezi Platinum Stars v Scottland ( Baobab)
NgeSonto: Highlanders v Greenfuel (Barbourfields), CAPS United v Triangle (Rufaro)
