Online Reporter
Thupeyo Muleya
ISILWANE ebesibangela ukuthi abantu bangalali ebusuku eBeitbridge kubikwa sibuyele eSouth Africa ngemva kokuchapha umfula uLimpopo.
Isilwane lesi ngesinye sezimbili ezingene eZimbabwe zivela endaweni yeGonarezhou, okuyingxenye yeGreat Limpopo Transfrontier Conservation Area (GLTFCA) equkethe amapaki aseMozambique, South Africa leZimbabwe.
Emavikini amabili adluleyo abantu bebelokhu besesaba ukuhlaselwa yisilwane lesi ebesizulazula engxenyeni yempumalanga yesigaba.
Esinye isilwane sisadingwa umkhondo waso eChiredzi.
Kusaziso somphakathi ngoLwesibili, ihofisi yeZimbabwe National Parks and Wildlife Management (Zimparks) eBeitbridge ikuqinisekisile lokhu.
“Isilwane ebesilokhu sizulazula sibangela ukwesaba okukhulu emphakathini eBeitbridge sibuyele eSouth Africa njalo kubikwa silubhekise eMusina.
“Sihambe umango ongange 24km siqonde empumalanga sayachapha umfula uLimpopo sabuyela eSouth Africa citshe ngezikhathi zehola lika1900hrs ngoMvulo,” kutsho iZimparks kusaziso.
“Lezi zindaba ezinhle kakhulu kumphakathi wesigaba seBeitbridge, iZimparks kanye labo bonke abathintekayo. Sithanda futhi ukuthatha lelithuba ukubonga iZimbabwe Republic Police, iZimbabwe Revenue Authority, iBeitbridge Rural District Council (BBRDC) ngeqembu layo leCAMPFIRE kanye labo bonke abathintekayo ababehlanganyela ekuzingeleni lokulandeleni isilwane lesi”.
