marble nkomo
Nkosilathi Sibanda
KUVUNGUZA umoya wenjabulo esigabeni seMaphisa, esabelweni seMatabeleland South nanko phela izakhamizi zakulindawo sezilungiselele ukwamukela izethekeli kumkhosi omkhulu wokunanza iminyaka engu-46 yenkululeko yelizwe.
Umkhosi lo uzabe umhlaka 18 Mabasa eMaphisa Ground.
Lanxa kungumkhosi onanzwa kuzo zonke izabelo, umcimbi walonyaka usuphenduke waba yisibonakaliso sentuthuko elethwa nguHulumende weSecond Republic ekhokhelwa nguMongameli Emmerson Mnangagwa.
Inkundla yeMaphisa Grounds isiguqulwe yaba yindawo elezakhiwo zakulezinsuku ngemva kokulungiswa okukhulu.
Inkundla le isilungiswe ngendlela ephakemeyo, kwakhiwa lendawo zokuhlala ababukeli, kwalungiswa phakathi lapho okudlalelwa khona inguqu, okwenza ifanele ukuphatha imicimbi emikhulu. Izakhamzi zithe lokhu kuzaba lilifa elizahlala lisiza umphakathi okwesikhathi eside.
Ngasikhathi sinye, uHulumende uqhubeke ngokwakha ama-laboratory ezikolo, okukhangelelwe ukuphakamisa izinga lemfundo kulindawo.
Imigwaqo layo ayitshiywanga emuva njengoba isilungisiwe njalo yaphuculwa.
Ekhuluma ngamalungiselelo uMphathintambo weProvincial Affairs and Devolution eMatabeleland South u-Albert Nguluvhe uthe sebelilindele idili likazibuse.
“Sethula isibongo esikhulu kuHulumende loMongameli Mnangagwa ngokuvumela ukuthi iMatabeleland South iphathe umkhosi kazibuse, iZimbabwe ithakazelela iminyaka engu-46 yenkululeko,” kutsho uNguluvhe.
“Kwenziwe okunengi esabelweni sethu okugoqela ukwakhiwa kwama-laboratory angu-40 ezikolo, ukwakhiwa kwemigwaqo lokuthuthukiswa kwezinye izakhiwo zikazulu. Inhloso yethu yikubonisa amathuba akhona esabelweni lokukhuthaza ukubambana.”
UMphathintambo wogatsha lwezemvelo kuHulumende uuDokotela Evelyn Ndlovu uthe:
“Kuhle ukubona intuthuko isiza esabelweni seMatabeleland South kulandelwa isinqumo sikaHulumende sokunikeza zonke indawo ithuba lokuqhuba umkhosi kazibuse.”
Umsekeli kaMphathintambo wogatsha lwe-ICT kuHulumende, uDingumuzi Phuti, uthe ukuthuthukiswa kweMaphisa lezinye indawo esabelweni kuzavula amathuba amatsha.
“Ukuthuthukiswa kwendawo le kuzakwenza kube lula ukudonsa ingqubekela phambili elethwa ngamabhizimusi kunye lokuhlanganisa ukuxhumana nge-internet, okuzanceda abatsha lamabhizimusi.”
Umgcisihlalo weZanu-PF Youth League eMatabeleland South, uMoses Langa, uthe abatsha bazaba lenzuzo enkulu kulintuthuko:
“Njengabatsha, sibona amathuba amanengi evela kulintuthuko. Sifuna ukubamba lumsebenzi, sibe yingxenye ekwakheni ikusasa elingcono, sisebenzisa amathuba esiwaphiwayo,” kutsho uLanga ekhuluma lephephandaba likazulu.
Induna yakulindawo uFuyane, layo iveze ukuthokoza kwayo ngosuku lukazibuse.
“Intuthuko esiyibonayo lapha iyamangalisa. Kusukela emigwaqweni, ezikolo kuze kuyefika enkundleni, konke lokhu kuyasinceda njengabantu.”
Omunye wezakhamizi zeKezi, okhulume lentatheli, uMnumzana Melusi Ndlovu, uthe lemuli yakhe bazavuka ekuseni ngoMgqibelo beqonde eMaphisa.
“Akulalwa kusukela ngoLwesihlanu lapha. Abantu bajabule kakhulu ngoba asikaze sakubona ukuphakanyiswa okunje. Sivumelana labomakhelwane ukuthi sivuke ngovivi siyeMaphisa,” kutsho uMnu Ndlovu.
Online Reporter