Online Reporter
Nkosilathi Sibanda
UMBIKO wokuthi imncintiswano yemidlalo yabasakhulayo, ama-youth games isizaphenduka wamukelwe ngenjabulo ezikolo lakungatsha ezigxile ekulolongeni ithathenta lentsha.
Ukuphenduka kwama-youth games kuvezwe ngeviki edluleyo ngumgcisinihlalo wenhlanganiso yeSports and Recreation Commission (SRC) uNathaniel Madzivanyika ngesikhathi evakatshele eGwanda, eMatabeleland South.
Imidlalo yabatsha le, ehlanganisa ithalenta lezabelo zonke, yacina ukuqhutshwa ngo2019, ngemva kokuqhamuka komkhuhlane weCovid 19.
Imidlalo le incintiselwa ngabatsha abaleminyaka yokuzalwa engaphansi kwamatshumi amabili.
UMadzivanyika uthe imidlalo izaqhutshwa njalo ngo2026, esabelweni seMashonaland East.
“Silokuthaba ukulitshela ukuthi sizaphendukisa imidlalo yeZimbabwe National Youth Games, ekadw ingaqhutshwa kusukela ngomnyaka ka2019 ngenxa yeCovid-19. Imidlalo ezayo izaqhutshwa eMashonaland East,” kutsho uMadzivanyika ngesikhathi enikeza isipho se-kit kuqula lemidlalo eleMatabeleland South.”
Ngokuzwa ngokusungulwa kakutsha kwemidlalo, inkokheli zamakolitshi ezemidlalo zithe sekuzakuba ngcono ngoba abadlali sebezathola umncintiswano ozabaphakamisa.
Umqondisi wePonel Youth Soccer Academy eseDete, eMatabeleland North, uNelson Ndeka uthe ama-youth games yinkundla yokuvulela abasakhulayo amathuba.
“Imncintiswano emikhulu njengama youth games ibaluleke kakhulu ekulolongeni ithalenta labantwana. Ungakhangela ukuthi kumidlalo lapho iqhutshwa, kusukela ngo2003, banengi abadlali abathola amathuba wokuthi bakhethwe kumaqembu elizwe lokuyazama inhlanhla phetsheya. Kumdlalo wenguqu bakhona abasuka kuma youth games bathengwa ngamaqembu aphezulu.
“Sifisa ukuthi nxa imidlalo le iphenduka, kube lenguquko ngendlela eqhutshwa ngayo, kuphathise abantwabethu ukuthi bathole ulwazi, imfundiso lezixwayiso ezizabenza babengabadlali bohlonzi, abasebenzisa ezemidlalo ukuphakamisa impilo zabo kunye lomphakathi,” kutsho uNdeka.
Ngaphandle kokuvulelwa amathuba, abatsha bachitha isikhathi bencintisana, endaweni yokuthi bagijimele ukuphatheka kuzidakamizwa, ngokutsho kukaColleen Nyambiya oweYoung Flying Stars Sports Academy ekoBulawayo.
“Imidlalo le kumele iqhutshwe. Abadlali bethu bathole isikhathi sokuthi bafunde okunengi lokuthi bajwayelane labo sowabo.
Ngesikhathi kulesikhalazo sokusetshenziswa kwezidakamizwa, ngibona angathi ama-youth games azancedisa intsha yethu ukuthi izigcine kuhle,” nguNyambiya lo.
