Online Reporter
Sukulwenkosi Dube-Matutu
NGEMVA kokubuya evela eSouth Africa, uSekhona Nkomo ufike watshaya wagongoda umalumakhe wambulala, kumbango wokuthengiswa kwenkomo.
UNkomo (25), ohlala eSigodini, eMatabeleland South, kubikwa mhlaka 9 Mpandula waxabana lomalumakhe uNorman Moyo (54). Wadobha ugodo wamgongoda umalume kabili entanyeni.
UMoyo wahanjiswa esibhedlela, wedlula emhlabeni mhlaka 17 Mapndula.
Isikhulumi samapholisa esabelweni seMatabeleland South, u-Inspector Chiratidzo Dube, uthe: “Isehlakalo lesi senzakala mhlaka 9 Mpandula ngehola letshumi ebusuku. UMoyo walimala, wedlula emhlabeni mhlaka 17 Mpandula esibhedlela.”
U-Inspector Dube uchaze ukuba uNkomo lomuyi babehlangene lemuli yabo, bejabulela ukuza kukaNkomo evela eSouth Africa. Kwakunathwa utshwala kusosiwa lenyama.
“Ngesikhathi bejabula, uMoyo walanda uNkomo wamchasisela ngokuthi wathengisela uyise inkomo. Lokho kwadala ukuthi kube lengxabano phakathi kwabo, uNkomo esethese umalumakhe ukuthi waqila uyise. Umsolwa wadobha ugodo wagongoda uMoyo kabili entanyeni. UMoyo wahanjiswa esibhedlela seSigodini District Hospital, wadluliselwa esibhedlela seMpilo.’
Uthe udaba lwabikwa emapholiseni, kwabotshwa uNkomo.
