YiNtatheli kaMthunywa
KUDABA olulokhu lusemilonyeni yabantu, kulenjiva eklinye yabulala unina kunye lomntwana oyisihlobo ngemva kokuxabana kubangwa ukudla ngeSonto efika evela eSouth Africa.
Injiva le, uBlessed Gatsi, oleminyaka engu-35 yokuzalwa, kubikwa wathi eqeda ukwenza lokhu wadliwa ngumswenya.
Kubikwa ngosuku afika ngalo ngakibo koChihota ebusuku waxabana lonina, uRudo Ukama
oleminyaka engu-74, kubangwa ukudla wamklinya wafa.
Ngemva kwalokho wagxavuna omunye umntwana owayesendlini, uLeen Gatsi oleminyaka emithathu yokuzalwa, wamtshayelela ngamandla emdulwini, wafa.
UGatsi uthe eqeda ukwenza lokhu, wabaleka njalo kakatholakali.
Isikhulumi samapholisa elizweni, uCommissioner Paul Nyathi, uqinisekise ngokubulawa kwabantu laba ababili njalo wacela uzulu ukuthi ancedise ngolwazi oluzaphathisa ukuthi kubotshwe uGatsi.
UCommissioner Nyathi uthe uGatsi wayesuka kweleSouth Africa njalo wafika ngakibo ngeSonto ebusuku elabantwana bakhe.
Kubikwa ukuthi kwaba lokungazwanani phakathi kwakhe lonina.
Amapholisa athi uGatsi waqala ngokukhama unina waze wafa, wasephakamisa omunye umntwana owayesendlini wamtshayelela emdulwini.
UGatsi usadingwa ngamapholisa.
“IZimbabwe Republic Police iqinisekisa amacala amabili okubulala, owesifazana lomntwana, esigabeni seChihota.
“Umsolwa kulelicala yindodana yowesifazana owatshonayo, ubalekile ngemva kokwenza icala,” kutsho uCommissioner Nyathi.
Isikhulumi samapholisa elizweni, uCommissioner Paul Nyathi, uqinisekise ngokubulawa kwabantu laba ababili njalo wacela uzulu ukuthi ancedise ngolwazi oluzaphathisa ukuthi kubotshwe uGatsi.
