adminkuloba uPathisa Nyathi
UKHONA ongaseluleka ukuthi ingaphi le indawo yokuthula? Banengi abalidingayo izulu. Sikhuluma ngale indawo sengathi yindawo ekhatshana kodwa enhle esifisa ukuyafika loba ukuhlala khona. Phela sizwa kuthiwa ikhona indawo ethiwa yiGehana, iSihogo lapho okulomlilo otshisa vutha ukwedlula owenkuni zomtswiri. Futhi lapho sizwa kuthiwa ikhona indoda elolunya elomoya omubi ethiwa nguSatani.
Indoda le izwakala ukuthi iphatha ifologwe enkulu eyisebenzisa ukuchochombisa abalezono lapha emhlabeni.
Ithi ngapha ibachochombisa ngapha abalezono yona itshaya umlozwi ingagqize qhakala. Iyathaba nxa sisenza izono lapha emhlabeni ngoba isuka indoda le izuze umsebenzi. Layo ike ivike lapho ilihlo lomoni selidubuka liqonda indoda le elihlweni layo. Izitho esezinanabukile zakhukhumala sengathi ngamasositshi iyathanda ukuzibukela sezisesimeni leso. Pho ngubani othanda ukuthi aye kule indawo yosizi indawo yokukhala lokugedla kwamazinyo?
Sizwa kuthiwa lalabo abalensini mhlalokho labo bazaphiwa amazinyo ukuze bagedle uSatani athabe esizwa umsinjwana wamazinyo.
Mina ngithanda izulu. Lapha siphiwa umfanikiso wendawo emanyazelayo ngamaluba. Imvevane ezemibaka ekhangayo zibhuza ziyele lale. Amanzi acwebileyo ageleza abezimpophoma ezikhanga ingqondo kuthi lebihlulukelwe imamatheke. Amanzi angathi alekaka lapho kaziwa. La ngamanzi abethwa ngumoya olamakha amnandi sengathi luqhatshi lomguza, olwemadlana loba olwenkiza.
Ngitsho lenyamazana zakhona kazidlani njengezalapha komhlaba. Le isilwane sizwana lempala. Lapha ingwenya idumela umuntu imbhuqele emanzini isitshaya isabhenqu ukuze osebanjiwe abanjwe yisiyabakazana afe elesiyezi angakaze asiphuphe loba nini. Umhlaba wezulwini akusiwo owalapha okuphila abalamandla. Abanye konke lokhu bathi yize leze. Bayaphila nje, ukuthi kuzakuthini bangafa akusindba yabo lokho ngoba boba bazakuba sebethule.
Ukuthi kulento ethiwa ngumphefumulo kabakwazi, kabadingi lokukwazi?
Usungazibuza ukuthi indoda yakoNyathi le yanakana ngalezi izindaba zamaphethelo empilo sekutheni. Mina ngizibiza umafavuke onjengedabane. Kuviki elidluleyo ngazibona sengiqoqoda emasangweni omunye umhlaba engithemba ukuthi ungeke wabaliGeha. Angithi ngingumuntu omnandi oletshukela, hatshi edliwayo kodwa egulwayo.
Ngathi nje ngizibalela iphephandaba langeSonto ngabona ngingasabonisisi. Ngadobha amangilazi ukuthi ngibone kuhle kodwa kwehlula. Ngacina khona lapho ngoba okwalandelayo yinganekwane engiyizwa ngelikabathi. Bathi ngacitsha ngathula zwi ngahlanganisa amazinyo. Ngasengingathi ngiyaraharaha sengathi ngumuntu ovalelisayo lapha komhlaba. Omakhelwane bahlatshelwa umkhosi beza beyizivunguzane. Abanye kuthiwa ngabayadinga ikhokhokhola bangifunza kodwa akwaze kwasiza. Letshukela yazanywa akusizanga.
Ezulwini loba khona eGehena kuya asebehlanganise imihlathi abangasawuvuli. Le ubukela uthule , ubukela zona izingilosi esizwa kuthiwa zilempiko ziyabe zilokhu zindizandiza zisamukela abafikayo. Lakhona eGehena kuya abathuleyo asebefuna ukuphendulwa bethule. Angazi ke ukuthi mina ngangiwaqondise ngaphi amabombo. Kodwa uSatani akhohlwe aphinde kangiyi lapho akhona. Ukuthi ilihlo lami liyemdubukela angikuthandi.
Yangithatha imota yomfana ongumakhelwane, uSista omkhulu kwesinye isibhedlela lapha koBulawayo lobaba ongumakhelwane loNakaBantwana yaphapha yangena amarobhothi ebomvu. Kuthiwa bahamba bengincweba kwakhanya ngisizwa ukuhlungu lokhu kwabapha ithemba lokuthi engxenye angikazimiseli ukutshiya umqombothi walapha komhlaba.
Zabangisana ijekiseni zizitika enyameni zami ezinye zingikhafulela amanzi alwisana lokusweleka kwetshukela.
Kuthiwa kwelikade ngabonakala sengathi ngilahlekile kodwa ngiphosa izibhakela ezingawisa lendoda engangoSatani. Kancane kancane ngaqala ukubona abantu abasebengihanqile. Ngakwazi ukuthi izulu sengilikhuthile. LeGehena lalo ngasengilikhuthile. Wadana uSatane!
Online Reporter