adminYiNtatheli kaMthunywa
INHLANGANISO yeBulawayo Christian League isibike ukuba avulekile amasango kwabesifazane abafisa ukungena kwezemidlalo.
Umongameli weBCL okuyinhlanganiso yamakholwa ekhangele ezemidlalo uTimothy Mandizadza uveze ukukhathazeka ngenani labesifazana eliphatheka kwezemidlalo.
“Sisungule umdlalo wokuqaga kuligi yethu ngomnyaka ophelileyo ngenjongo yokuhuga abesifazane kwezemidlalo kodwa inani labo lokhe lisesephansi,” kubika uMandizadza.
UMandizadza ubike ukuba abesifazana kumele bathathe umzekeliso kulokho okwenziwa liqembu lamaPositoli lona elaphuma lizintshatshu kuligi, baphatheke kwezemidlalo.
“Isipho sikhona kwabesifazane kodwa nxa bengakhuthalanga bangena kwezemidlalo lithalenta elizazifela nje,” kuveza uMandizadza.
UMandizadza ubike ukuba abesifazane abatsha kumele bafunde okunengi kumidlalo yama Youth Games adlulayo.
“IBulawayo Christian League izimisele ukukhipha abadlali abazakuyamela ilizwe kumidlalo efana leyama Youth Games ngoba sikholwa ukuthi lakithi kungaphuma abadlali abadlala okwamagama,” kubika uMandizadza.
UMandizadza ubike ukuthi inhlanganiso yakhe ilohlelo lokusebenzelana labomama emabandleni abalakho ukukhuthaza abasakhulayo ukuba baphatheke kwezemidlalo.
“Silethemba ngokusebenzelana labomama emabandleni inani labatsha ikakhulu abesifazane lizakhula ngoba ezemidlalo zihlanganisa abantu kungakhathelekile ukuba bavela kuwaphi amabandla,” kuveza uMandizadza.
UMandizadza uveze ukuthi abatsha laba kumele basebenzise iBulawayo Christian League ukuveza amaphupho lamathalenta abo.
Kusenjalo, iBulawayo Christian League isibike ukuba lonyaka izethula eminye imihlobo yemidlalo efana labo Judo abaqale ukuyibona ngama Youth Games ukuze amalunga athole ukukhetha imidlalo ayithandayo.
“Njenge Bulawayo Christian League sifuna ukwethula imidlalo emitsha okuzenza ukuthi amalunga ethu akhethe imidlalo ayithandayo,” kuphetha uMandizadza.
Online Reporter