Online Reporter
Gibson Mhaka
KULEZINSUKU ilokitshi leCowdray Park koBulawayo seliphenduke laba yindawo egcwele indaba ezimangalisayo ngemva kokuba omunye usiphatheleni eveze inkawu athe isimhlukumeza ngemva kweminyaka eyisebenzisa ukuthathela abanye imali zabo.
Indoda le, kubikwa ukuba ivume ukuthi yayisebenzisa inkawu le ukuthatha imali ngendlela engaziwayo kwabanye osiphatheleni abasebenza phakathi kwedolobho lakoBulawayo.
Kubikwa ukuthi ngenxa yalokho yathola inotho enkulu, yathenga izindlu endaweni ezitshiyeneyo zedolobho njalo yazithengela lezimota ezinengi.
Kodwa inotho leyo kuthiwa yacina isiyimpilo yohlupho.
Ngokwemibiko etholwe liphephandaba likazulu, indoda le yathi inkawu yayisiqalise ukumcela izinto ezesabekayo, ezigoqela ukuthi alale layo ukuze iqhubeke imnika inotho.
Indoda le iveze ukuba isikhathele, ikhumbule ngomunye usomabhizimusi obesolwa ngokusebenzisa isikhova ukuthola inotho, wasizwa ngesikhathi somkhuleko wokukhululwa owenziwa nguMadzibaba Emmanuel Mutumwa webandla leJohanne Masowe Yechishanu.
Ngeviki edluleyo, usiphatheleni lo waya emhlanganweni womkhuleko eCowdray Park lapho afike wavuma khona phambi kwabantu ababebuthene.
Ababekhona bathe ekuqaleni wayezama ukufihla iqiniso esithi inkawu le yinyamazana nje ayifuyileyo.
“Waqala waqamba amanga esithi inkawu le wayeyigcinela ukuzijabulisa kuphela. Kodwa ngesikhathi kuqhubeka imikhuleko lemibuzo, iqiniso laqala ukuphuma,” kutsho omunye wababekhona.
Kubikwa ukuthi uMadzibaba Mutumwa watshela indoda le ukuthi ibuyele ekhaya iyelanda inkawu leyo.
Okumangalisayo yikuthi yakwenza lokhu.
“Abantu abanengi babecabanga ukuthi uyadlala ngesikhathi evuma udaba lolu. Kodwa uMadzibaba wathi kahambe ayelanda inkawu nxa ekhuluma iqiniso,” kutsho omunye umfakazi.
“Samangala lapho ebuya layo. Okunye okwethusileyo yikuthi inkawu le yafika igqoke ijazi. Abantu abanengi baqalisa ukubaleka ngokwesaba.”
Omunye umfakazi uthe indoda le yabonakala idangele kakhulu ngesikhathi ichaza indlela eyayisebenzisa ngayo inkawu.
“Yavuma ukuthi yayisebenzisa inkawu ukuthatha imali kwabanye abatshintsha imali phakathi kwedolobho. Yathi yiyo eyenza yathola imali yokwakha izindlu lokuthenga izimota,” kutsho umfakazi.
“Kodwa yathi khathesi inkawu le yayisiyiphendukele. Abantu bathi cwaka ngesikhathi isichaza ukuthi inkawu le isifuna ukuya laye emacansini.”
Ekhuluma lentatheli, uMadzibaba Mutumwa ukuqinisekisile ukuthi indoda le yafika ifuna ukukhulekelwa.
“Kuliqiniso ukuthi indoda le yafika ifuna ukukhululwa ngemva kokuba into eyayiyithembile ukuze ithole inotho isiphenduke yaba yinkinga kuyo,” kutsho uMutumwa
“Abantu kumele bakwazi ukuthi inotho etholwa ngendlela ezingalunganga ivame ukuza lezijeziso ezinzima. Akulandlela ezimfitshane empilweni.”
Unxuse abantu ukuthi basebenze nzima njalo bathembele kuNkulunkulu.
“Sebenzani nzima, likhuleke njalo lithembe uNkulunkulu. Lingadingi inotho ngamandla obumnyama ngoba okubonakala kuyisibusiso kungaphenduka kube yisihluku.”
Udaba lolu luza ngemva kolunye olwamangalisa izakhamuzi zeCowdray Park kumaviki amabili adluleyo lapho okwakulesikhova okucatshangelwa ukuthi ngesikasomabhizimusi othile.
Kubikwa ukuthi ngesikhathi kukhulekelwa umkakhe owayegula kwavela isikhova esikhulu esasiphapha sizungeza indawo yomkhuleko.
Abanye bathi abantu baqalisa ukukhala kuthi abanye bacatsha ngemva kwezihlahla lezimota ngenxa yokwesaba.
UMadzibaba Mutumwa wathi isikhova leso sasingesikasomabhizimusi lo njalo kuthiwa wayesisebenzisa ukuze ibhizimusi lakhe liphumelele.
