Ubotshwa elamathani amabili embanje

The man, who had been robbed of his vehicle, cash, and valuables by a three-member gang, recognised one of the culprits, resulting in justice being served

KUBOTSHWE indoda eleminyaka engu-58 ngemva kokuba itholakale ilembanje ezilesilinganiso esingaba ngamathani amabili kwenye itruck stop eseSoutherton, eHarare ngoLwesibili.

UTapson Ndou ongumtshayeli wezimota ezinkulu ubotshwe kulandela ukuncwetshwa kwamapholisa indlebe abikelwe ukuba kulemota yohlobo lwe 30 tonne truck ethwele imbanje engene elizweni leZimbabwe ivela South Africa.

Ngemva kokumisa uNdou, amapholisa ahlole imota athola amathani amabili embanje efihliwe phakathi kwemota le.

UNdou kubikwa wehlulekile ukunika ingcazelo ecacayo ngalokhu akuthweleyo. Amapholisa ahle ambopha njalo uwancedisa ukucubungula icala leli. UNdou ukhangelelwe ukuvela emthethwandaba maduze.

Kolunye udaba olufanayo, isikhulumi samapholisa elizweni uCommissioner Paul Nyathi uqinisekise ngokubotshwa kukaGordon Nkowu (58), Nkosiyabo Moyo (57), Shepherd Nkomo (43), Beven Sibanda (40), lo Isaiah Moyo (31).

Abasolwa laba abahlanu babotshwe emgwaqweni osuka koBulawayo usiya eSolusi betshayela imota yohlobo lwe Toyota Hilux Single Cab, elenombolo ezithi DN08VG-GP, ebidonsa i-trailer elenombolo ezithi KW27Y2-GP, ebithwele imbanje ezilesisindo esingange 360 kg ezibiza imali engange ZIG 10,800,000.

Imbanje lezi zingeniswe elizweni ngudlu zisuka eSouth Africa.

“Amapholisa azimisele ukumisa udubo lokuthathwa kwezidakamizwa elizweni,” kutsho uCommissioner Nyathi. Wengezelele wathi amapholisa ake abopha abanye abasolwa eBeitbridge, Mutare kanye leHarare abatholakale belezidakamizwa.

Uzulu ukhuthazwa ukuba ahlale eqaphele njalo abikele amapholisa ngabantu abathengisa izidakamizwa kuloba yiphi inkamba yamapholisa eseduzane labo.