Online Reporter
Lovemore Dube
IQEMBU leNkayi Academy eselileminyaka emithathu labunjwa, livule abantwana amehlo ngokubahambisa eHarare kumpelaviki edlulileyo.
Uhambo lolu bekuyikuyadlala kumdlalo obuqoqwe yiFC Porto Academy.
Bathwala nzima ngoMgqibelo bedlala labadlali abangani abakhulu kodwa ngeSonto kwabangconywana ngoba labo benelisa ukunqoba imidlalo emibili kwemithathu.
UNever Sibindi, umaneja weNkayi Academy elamankazana labafana kusukela ku-Under-13 kusiya ku-Under-17 uthe ukuya esigodlweni kwabayinto enhle kakhulu ngoba injongo kwakuyikuvula abasakhulayo amehlo.
“Sahlala siliqembu sathi sesigijime kakhulu sodwa siseNkayi leMatabeleland North. Kumnyaka lo odlulileyo sesiye koBulawayo leHwange sadlala eNyathi laseNkayi.
“Kuminyaka abakuyo okubalulekileyo yikuthi badlale imidlalo eminengi bafunde umdlalo, babelesibindi,” kutsho uSibindi.
Uthe ukuya eHarare bakubona kulinyathelo elihle.
“Kuvele khona kunobhutshuzwayo kuqalwa phansi. Konke lokhu kuphe abatsha intshukuntshu yokufuna ukukhula bedlala ibhola,” nguSibindi lo.
Uthe ukuhamba ngokunye okuvula abasakhulayo amehlo njalo kubuye kubeyinto ekhwabithekayo abazayi babaza okwesikhathi eside
“Abanye kade beqala ukuphuma phandle kweNkayi, bafunde okunengi njalo sokungugwabi gwabi kubangane. Sokuzakhuthaza labanye ukuthi baze kuNkayi Academy.
“Sabona lathi emehlweni abafana ukuthi basuthisekile, bajabulile ngohambo lwabo lokuya eHarare.”
Uthe abadlali babo bathola lethuba lokuya bukela iCaps United idlala leTelOne eRufaro.
“Ngamaqembu afana laboHighlanders abawezwa kuma-radio lakungxoxo zabantu. Balithola ithuba lokwamukelwa yiCaps United.”
USibindi uthe balokujabula kakhulu ukuthi njengeNkayi Academy sebelomntwana owenelise ukuthi akhethwe ukudlalela iZimbabwe.
Ubelilunga leqembu lesizwe elidlale kuCaf Schools tournament.
