Online Reporter
Nkosilathi Sibanda
INHLANGANISO ebona ngomdlalo wePickleball elizweni, iZimbabwe Pickleball Association (ZPA), isikhethe inkokheli ezintsha ezintathu ngenhloso yokuqinisa indlela yokuphatha lokuthuthukisa umdlalo lo ezabelweni zonke zelizwe.
Inguquko le iza ngesikhathi inhlanganiso ifuna ukubona umdlalo wePickleball ususiba ngomunye wemidlalo okhula ngesiqubu kuleli, okugxilwe kakhulu ekuphathweni kuhle, ukuthuthukiswa komdlalo lokuwusabalalisa emphakathini.
Phakathi kwenguquko ezenziweyo, uVuyelwa Mangena uphiwe isikhundla sokuba nguNobhala jikelele wenhlanganiso, kuthi u-Edmond Mutetwa ohlala eHarare usebambe isikhundla sikaMsekeli kamongameli. Bobabili bangene ezikhundleni ezazitshiywe nguTakunda Zhungu loGladness Ndlovu ngemva kokwehlukana lenhlanganiso.
Kusenjalo, uCollen Moyo ususwe esikhundleni sokumela abadlali waba ngumqondisi kwezokuthuthukiswa komdlalo.
UMongameli weZPA uMthandazo Ngwenya utshele iphephandaba likazulu ukuthi lokhu kwenziwe ngenhloso yokwakha iqembu labakhokheli abazimiseleyo ukuthuthukisa umdlalo.
“Ukukhethwa kwabo kuqhubeke ngendlela ehlelekileyo. Sifuna abantu abalothando lomdlalo njalo abazimiseleyo ukuwuthuthukisa. Ukuphathwa kuhle lenhlonipho yemithetho yikho okwakha inhlanganiso ephumelelayo, ngakho yikho esigxile kukho,” kutsho uNgwenya.
Uthe ukungena kukaMutetwa kuzakwenza kube lula ukwandisa umdlalo ezigabeni zenyakatho lempumalanga yelizwe lasemaphandleni.
“Uleminyaka eminengi esebenza kwezemidlalo lokuthuthukisa umphakathi. Sikholelwa ukuthi uzancedisa kakhulu ekusabalaliseni umdlalo wePickleball ezindaweni ezintsha ukuze abantu abanengi bathole ithuba lokuwudlala.”
UMutetwa uthe uyakuthabela ukukhethwa kwakhe njalo uzasebenza gadalala ukukhulisa umdlalo.
“Ngiyabonga kakhulu ngokungithemba. Ngizagxila ekuqiniseni inhlanganiso ezigabeni, ukwengeza inani labadlali lokwethula umdlalo ezikolo. I-Pickleball ilekusasa elihle eZimbabwe njalo ngiyajabula ukuba yingxenye yokuyikhulisa.”
Inhlanganiso le isiqalisile ezinye inhlelo zokuthuthukisa umdlalo. Ngeviki edluleyo ibe lezifundo ezenziwe ngobulembu bokuxhumana ebeziqondiswe ebantwini bezigaba ezisenyakatho lempumalanga yelizwe.
UNgwenya uthe impendulo evela kubathandi bezemidlalo ibinhle kakhulu, njalo ezinye izikolo eBuhera seziveze ukuthi sezilempahla zokudlala iPickleball.
“Sakha iqembu eliqinileyo njalo elizimiseleyo ukusebenza ukuze iPickleball ifinyelele phezulu. Impumelelo ngeke ifike ngelanga linye, kodwa izinqumo esizenzayo lamuhla zizanceda kakhulu ikusasa lomdlalo,” kutsho uNgwenya.
