Online Reporter
Ethel Ncube
IMADOLONZIMA imuli yeKhomayanga, eNkayi ngaphansi kwenduna uMadliwa kulandela ukubulawa kwenye indoda, yinjiva ngoba ibuze isikwelede sayo samabele.
UReason Bhebhe udlule emhlabeni mhlaka 2 Zibandlela, ngemva kokubhaxabulwa kanye lokuhlahlelwa ngehloka umzimba wonke nguOwen okuvele ukuba usebenzisa izibongo ezibalisa uNgwenya, Siwela loNkomo labantwabakhe kubangwa imali yamabele.
Kucatshangelwa ukuthi uOwen waqala ukuhlasela uBhebhe ngesikhathi besezitolo zeGwamayaya wasuka lapho emhudula waya laye emzini wakhe lapho afika wamthelela labantwabakhe bambhaxabula ngapha bemhlahlela ngamahloka.
Umzimba kaReason lokhe usemotsha koBulawayo njalo kusakhulunyiswana labangakibo kukamsolwa.
Kucatshangelwa ukuba umsolwa esedale icala leli wabaleka lemuli yakhe njalo uzwakalela eSouth Africa.
Intatheli ixhumane lomunye welunga lemuli njalo engusobhuku wakule indawo uMnumzana Benjamin Bhebhe obike ukuba kulokhu kusakhulunyiswana.
“Silusizi ngokulahlekelwa ngumntanethu uReason Bhebhe ngesihluku esingaka. Umuyi wayesezitolo eGwamayaya lapho uOwen atshaya khona uReason wamhudula wahamba laye elabantwabakhe emzini wakhe.
“Efika laye emzini wakhe wamhlasela langamahloka qede wamtshiya phandle wangena endlini walala.
Unina kaBhebhe wafica umntanakhe esaphila wamfuqa ngebhara beqonde ngakibo kodwa bathi besendleleni wedlula emhlabeni,” kulandisa uMnu Bhebhe.
Uqhubekele phambili eveza ukuba indaba le kulokhu kusakhulunyiswana ngayo.
“Umuyi kakabekwa, usemotsha koBulawayo. Sisakhulumisana labemuli yakomsolwa. Sifuna inkomo ezilitshumi okumele zibuye nxa umzimba kamuyi sufikile ngekhaya.
“Okwakhathesi inkulumo lokhe zisaqhubeka njalo kungavunyelwana sesizahamba-ke siyethatha umzimba sibeke umntanethu alale ngokuthula.
“Umsolwa yena wahle wabaleka lemuli yakhe, uzwakalela eGoli, sicela ukuncediswa abotshwe abhekane lengalo yomthetho,” kutsho uMnu Bhebhe.
Imizamo yokukhulumisana lamapholisa esabelweni seMatabeleland North yehlule kwaze kwafika isikhathi sokudindwa kwephepha.
