Online Reporter
Umzali yinto eligugu emhlabeni ngoba basinakekela ekuzalweni size sikhule senelise ukuzimela sodwa. Ngitsho lakuzinyamazana nxa unina wenyamazana thize angaswelakala kuyafuba, akukhuli ngendlela eqondileyo.
Lomntwana ongelabazali ukhula ehlulukelwe yikho lencwadi engcwele ekaMvelinqangi iBhayibhili ifundisa ukuthi hlonipha uyihlo lonyoko ukuze insuku zakho zande ezweni.
Angikaze ngimbone ophilayo ophikisana lomyalezo kaNkulunkulu walungelwa.
IBhayibhili alitshongo ukuthi kumele sibahloniphe abazali bethu nxa beyizinothi kumbe befunde kakhulu, umzali wakho ngumzali wakho, angaba yisicebi, ngumyanga, mude, mfitshane, yisigoga kumbe isiphofu njalo sikhumbule ukuthi lesiNtu siyagcizelela ukuthi ukukhonona komzali kuthelela umnyama kwesinye isikhathi kuze kweqele lasebantwaneni obazalayo.
Ngiyake ngizwe ubuhlungu, inhliziyo yami ijuluke igazi nxa ngibona umuntu edlala ngomzali wakhe embiza ngamagama afanana lokuthi ngumthakathi ngoba mina abami ngibakhumbula njalonje ngoba bengasekho emhlabeni.
Zikhona ezinye izinkinga ohlangana lazo empilweni loba usukhule kangakanani ukhumbule ukuthi nxa ungatshela umzali wakho lobubunzima balelo jogwe bungaba ngcono.
Sisuka sithi sesibona izinto zingasihambeli kuhle sigijimele kubaphurofethi basithathele izimali lezimbuzi, inkinga idalwe nguwe ngokungahloniphi.
Abanye uthola umzali esidla ingqweqwe zomlomo, kwesinye isikhathi umzali agule aze ayokufa engasiwanga esibhedlela, abanye ngabahlala ezindlini okungathi yizilugu zabothekwani abantwababo besidla ngefologwe lokhezo emadolobheni.
Abanye baze baye ekhaya lapho okulomzali mhla efile uthole umuntu esethenga ingubo lebhokisi elidulayo kodwa esaphila bengazange bebenzele lutho.
Ufike utshelwe amanga ukuthi umzali uzondile kumbe ukufulathele ukhohlwe ukuthi besaphila awuzange ugcwalisele umyalezo weNkosi owokubahlonipha, abanye baze balise labazukulu bomzali wabo ukuthi bamvakatshele ngoba bethi akadabuli ngubo.
Siyalibala ukuthi iBhayibhili alitshongo ukuthi kumele sibahloniphe nxa kutheni kodwa lithi nsukuzonke ekuphileni kwakho ukuze insuku zakho zokuphila zengezelelwe.
Ayixabene.
