Online Reporter
Silo Mehleli Dube
Lonyaka izulu linile endaweni ezinengi elizweni lakithi imifula eminengi lokhe igeleza, leziziba lokhe zingakahubi.
Lenkotha isesenengi eluhlaza okutshengisa ukuthi amanzi asesekhona.
Ukwanda kwamanzi kutsho ukuthi njengoba isikhathi somqando sesifikile kuzagodola okwamagama ekuseni kuba letshongolo etshaya ibambe izandla uthole umuntu omdala esehlikihla izandla ezama ukuthi zikhudumale.
Abasemadolobheni liqaphele ukubasa izimbawula libe selikhohlwa ukuzicitsha, kulalezi imbawula ezabuya labondlebe zikhanyilanga ama-heater.
Ayingozi angekelwa ukusetshenziswa ngokunanzelela okukhulu.
Ngikhumbula omunye umngane wami owayelendlu emasabhabha yatsha qhu kwasala sekungumlotha kwathi yena engekho umntanakhe walayitha loluhlobo lwembawula amagetsi asehamba nangu laye ephuma esiya esikolo wakhohlwa ukuyicitsha kuthe amagetsi esebuyile kwatshisa endlini mhlawumbe wayetshiye amabhuku esikolo duze kwaleyo mbawula kwalumatha bazama ababona ngokucitsha kwemlilo kodwa kwehlula yaqhunqa kanjalo nje indlu yonke.
Labahlala emakhaya bakhona abalala bebase umlilo emkulwini nxa bekwejisile bathi nxa sebesiyalala bakhohlwe ukuzicitsha izikhuni, kube sekusiba lomoya kuphakame inhlansi zilumathise uphahla.
Abanye njalo ngabathi nxa befuna ukugada amabhasi aya edolobheni ngenxa yokuthi asuka emakhaya empondo zankomo bafika emadabukakusa ezilindweni zamabhasi baphembe inkalakatha yomlilo bedinga ukuzikhudumeza mhlawumbe lokuxotsha izipoko ukuthi nxa ibhasi isifikile bengazabe besacitsha umlilo abayabe bewubasile usale uqhunqisa iganga nxa kulemizi eduze lesilindweni kucina kusitsha lensimu lemizi yabantu, lezinanakazana zikaMdali ezinjengabonyoka, amagundwane lenhlobonhlobo yenyamazana zife kabuhlungu zibulawa lilangabi ngoba zona zingelajubane.
Kwesinye isikhathi emadolobheni kutsha lamafekithali ngenxa yembawula eziyabe zikhohlakele ukucitshwa yizisebenzi ziphelelwe ngumsebenzi abantwana babulawe yindlala, yingakho ngisithi asiqapheleni imbawula zethu sizicitshe nxa sesisiya lala kumbe nxa sesiqedile ukuwotha.
Ayixabene.
