Online Reporter
Ntombizodwa Moyo
AKUBONWA ngaso linye kumanina amabili ayizelamani okubikwa ukuba abanga ukuthandana lendoda inye.
UMary Muchena, owesifazane osetshade okweminyaka engu-26, uvele phambili kwenkundla yenduna uMutasa esola udadewabo omncane, uBrenda Makonesa, ngokumthathela umyeni wakhe, uJeremiah Muchena.
UMary utshele inkundla ukuthi udadewabo lomkakhe sebehlala bonke njalo sebaqalisa impilo entsha kwenye indawo eMutare, esabelweni seManicaland.
Uveze ukuba uBrenda waba lobudlelwano obuyimfihlo lomkakhe kwaze kwaphumela egcekeni sebethandana.
“Umnawami wangithathela indoda yami njalo khathesi bahlala bonke. Mina sengitshiywe ngingedwa,” kutsho uMary.
Uthe uBrenda wafika emzini wakhe esesemncane ngemva kokuqeda uGrade Seven.
“Wayeleminyaka engu-13 kuphela ngesikhathi efika ezohlala lathi ngesikhathi sekhefu. Nxa ngikhangela emuva, ngicabanga ukuthi yikho lapho ubudlelwano babo obaqalisa khona,” kutsho uMary.
Uthe umtshado wakhe, owawubhaliswe ngokusemthethweni kuMarriage Act [Chapter 5:11], wabhidlika ngoLwezi nyakenye lapho umyeni wakhe asuka emzini watshiya imuli.
“Sake saya emthethwandaba ngaloludaba. Wathi usangithanda kodwa kabuyanga ekhaya. NgoMabasa umantshi wamcebisa ukuthi abuyele emzini wakhe kodwa ulokhu engabuyanga,” kutsho yena.
Uphinde wasola ukuthi uBrenda, olabantwana labanye obaba, usephumelele ukuthatha indoda ayehlezi layo impilo yonke.
UJeremiah uvumile ukuthi wazala umntwana loBrenda kodwa wathi lokho kwenzakala kudala ngesikhathi yena loMary bexabene.
“Kuliqiniso ukuthi ngazala umntwana lodadewabo kaMary. Lokhu kwenzakala kudala ngesikhathi uMary esuke emzini ngemva kwengxabano ngemali yebhizimusi.
“Wahlala eSakubva okwenyanga ezimbili, yikho lapho engaqala khona ubudlelwano loBrenda. Wakhulelwa njalo umntwana lo uleminyaka engu-22 yokuzalwa khathesi,” kutsho uJeremiah.
Uthe ngemva kokuhlolwa kweDNA okwaveza ukuthi nguye uyise womntwana, imuli kaBrenda yambamba ngamandla ukuthi amthathe abe ngumkakhe
“Uyise wathi nxa iDNA isiveze iqiniso kwakumele ngimthathe.”
Uthe uMary wayengafuni lakancane ukuthi abe lomunye unkosikazi.
“Wayengisongela ngokuzibulala nxa ngingatshada loBrenda. Mina ngamtshela ukuthi ngilelungelo lokuthatha omunye umama kodwa wakwala lokhu,” nguJeremiah lo.
UJeremiah uphinde wathi umtshado wakhe loMary awuzange wenzeke ngokuzikhethela kwakhe ngokupheleleyo.
“Ngangivele sengilobudlelwano loBrenda kodwa uMary wathi sitshade ngokusemthethweni ngaphansi komthetho.”
Lanxa kunjalo, uJeremiah ukuphikile ukuthi uhlala loBrenda.
“Mina ngihlala eHarare, yena uhlala eHonde Valley. Ukuthi angisahlali loMary akutsho ukuthi sengihlala lodadewabo.”
UBrenda laye ukuphikile ukuthi wathatha indoda kadadewabo.
Uthe ngesikhathi ekhulelwa esesemncane wabuyiselwa kubazali bakhe njalo uJeremiah ekuqaleni walandula ukuthi nguye uyise womntwana.
“Ngesikhathi ubaba embuza ukuthi ngabe nguye uyise, walandula ngoba esesaba udadewethu. Wayemhlukumeza njalo emtshaya,” kutsho uBrenda.
Uthe ngemva kwalokho watshada lenye indoda waqhubeka lempilo yakhe.
Kodwa kuminyaka edluleyo kwadingeka ukuba kwaziwe uyise womntwana ngoba indodakazi yakhe isifuna iqiniso ngokuthi izalwa ngubani.
“Umntanami wathi ufuna ukuhlolwa kweDNA. Impumela yaveza ukuthi ngempela uJeremiah nguyise.”
UBrenda uvumile ukuthi wake wasongela udadewabo ngokuthi uzamthathela indoda nxa iDNA ingathi umntwana ngokaJeremiah.
“Ngakutsho ngentukuthelo ngenxa yokuthukwa engangikuthola. Kodwa lokho akutsho ukuthi ngihlala laye. Mina ngitshadile kwenye indawo.”
Uthe amalunga emuli aseleminyaka ezama ukusiza umtshado kaMary.
“Imuli izamile ukumsiza kodwa uhlala engisola nxa kulenkinga emtshadweni wakhe.”
Kusenjalo, uJeremiah uthe esinye sezizatho ezenza atshiye umuzi yikuthi wathola izinto ayesola ukuthi zisetshenziswa emikhubeni ethile endlini.
“Ngathola isigqoko esimnyama esilamanalithi phakathi kwembiza, njalo kwakulezinye izinto ezangimangalisayo esikhwameni sakhe. Ngesikhathi ngimbuza wangitshaya, ngaze ngayabika emapholiseni ngoba ngangisesabela impilo yami,” kutsho uJeremiah.
Lanxa kunjalo, uJeremiah uthe usamthanda umkakhe.
“Ngisamthanda umkami. Sibhekane lesikhathi esinzima nje kuphela.”
UMary kavumanga loba ukuphika ukuthi lezozinto zazikhona, kodwa wagcizelela ukuthi inkinga enkulu yibudlelwano phakathi komyeni wakhe lodadewabo.
Ebuzwa yinduna uMutasa ukuba ulobufakazi bokuthi laba bobabili bahlala bonke, uMary uthe kalabo ubufakazi obuqondileyo.
“Ngiyakwazi okwenzakalayo. Bake bahlala bonke eduzane kweLink Road basebethuthela kwezinye izindlu ezisemgwaqweni weForbes-Mutare Highway,” kutsho lumama.
Kodwa, ebuzwa ukuthi wake wababona ngawakhe amehlo, uthe wayesola nje ngenxa yokuthi umyeni wakhe wayesemtshiyile.
“Angisatholi amalungelo omtshado kumyeni wami, ngakho angazi okwenzakalayo.”
Iphawula ngaloludaba, induna uMutasa ixwayise ukuthi abaxabanayo balethe ubufakazi hatshi ukusola nje.
“Mina kangahluleli ngokusola. Nxa lisithi bahlala bonke, bisani ubufakazi. Inkundla ngeke yenze isinqumo esisekelwa ngokucatshangelwayo kuphela,” kutsho induna.
Induna icebise uMary loJeremiah ukuthi bacabange ngokwesula umtshado ngokusemthethweni nxa kungasabonakali ukuthi bangaphinda bathandane.
