Online Reporter
KWAKUTHI kuphuma impumela yabantwana ekuqaleni komnyaka ikakhulu eyemihloliso yebanga le-Ordinary Level ngicubungulisise ikakhulu eyezikolo ezingezansi yemaNdebeleni ngoba kulapho engizalwa khona njalo kulofokothi wami.
Into edukuda umoya wami yikuthi zikhona izikolo eziba lempumela efanayo umnyaka ngomnyaka. Sekuze kusaziwa ukuthi ezikolo thize akufundwa kodwa ababalisi labantwana besikolo bakhona.
Phela ukufunda kumnandi, ngize ngikhumbule omunye wababalisi bami wayengathandi impendulo ethi angikwazi, ngemva kwezifundo wayethi kumele utsho loba yiphi impendulo etshengisela ukuthi kukhona okuncane okubambileyo.
Ungakhangela nxa uqathanisa emhlubulweni wasempulanga izikolo zakhona zenza ngcono. Ngithe sixoxa labanye abangane bami esakhula safunda sonke esabelweni sakithi sigxile kuzikolo zesigodi sakithi ngoba lazo zikuleso sibaya sempumela ephansi, omunye umngane wami wathi yena ubona angani abantwana bakhathesi abaselandaba lemfundo. Omunye lomunye wayenika umbono wakhe, umngane wami uDingindawo wathi yena ubona angani lababalisi abaqhatshwa lezinsuku abaphekekanga bavuthisisa, mhlawumbe kubangelwa yikuthi sekuphonguqhatshwa loba ngubani.
Phela eminyakeni yezolo sisafunda kwakungavamanga ukuthola umfundi osadalala ezama ukubhala izifundo ze-O-level aphinde kuze kube kathathu kumbe kahlanu ephiwa indawo yokufundela ubububalisi. Mhlawumbe babekubona ukuthi kubanzima ukuthi umuntu onjalo afundise abanye njengoba uyabe echaphe nzima umfula uJodani.
Ngempela kungaba ngenye yembangela ezenza ukuthi abafundi bangaphumi kuhle ezifundweni ngoba ungalalela lesikhiwa esikhulunywa ngabanye ababalisi ezikolo yilesi esokuthi nxa singazwiwa yinkosazana yabondlebe zikhanyilanga angachila amakhala okomuntu obone ubulongo bechalaha obunethwe yimbolisamahlanga.
Ngiyake ngibezwe abanye bekhuluma emihlanganweni langendlela abaziphatha ngayo uhle uyifunde ivaliwe ukuthi okulandelayo yingozi. Yebo omunye wathi kubangelwa yikuthi iholo lincane kodwa ngangizibuze ukuthi kungani kweminye imihlubulo besenza ngcono nanku amaholo ayafana.
Isikolo engafunda kiso yayingatholwa lula indawo, kwakumele ube lempumela ephezulu lakho kwakupaswa okuzwayo kuze kukhulunywe lemisakazweni, khathesi saziwa ngempumela ephansi, into esuka ingimangalise yikuthi kusweleka lomntwana oyedwa ongezwa kuthiwa uphume lezingu-10 izifundo ngoba ngomnyaka ngomnyaka kuba yi-zero percent i-pass rate.
Angazi ukuthi kungenziwani ezikolo ezinje ngoba phela abantwana ngeke bafanane, ngomunye umnyaka kumele kuthiwe lonyaka bazamile hatshi ukuthi kufanane njengamanzi agelezayo umnyaka wonke. Ayixabene.
