Vusumuzi Dube
Nxa kuphela umnyaka sesibanga kunyanga kaLwezi loMpalakazi uthola kujabula wonke umuntu nanku phela lezulu liyabe seliqala kumbe selisewule sekumila utshani obutsha lezihlahla sezihluma amahlamvu amatsha ufice eluhlaza tshoko.
Inengi lezisebenzi ziyabe zihola amabhonasi, abahola ngengowane uthole belamaqubaquba emali kuthengwa lokhu lalokhuya okuloncedo lokungelancedo, abahlakaniphileyo bayayifukamela imali bayigcine ngoba besazi ukuthi uyeza uZibandlela uzathola kungani yinyanga ende kakhulu ukwedlula ezinye inyanga zona lobanje zilingana kumbe uthole zitshiyana ngensuku ezimbili kumbe ezintathu.
Okwenza ubone angani inde kakhulu linyanga yikuthi mhlawumbe amanye amankampani ahle avale uMpalakazi ephakathi laphakathi njalo izisebenzi ziphiwe iholo lazo eliphindwe kabili njalo ziphiwe lekhefu.
Abaya emakhaya bagade bahambe labaya endaweni zokuzithokozisa lokujabula bahambe idliwe imali kuthengwe izibiliboco kulalwe ngesibomvu nsukuzonke ize iphele imali, ngikhumbula elinye ikhehla engake ngasebenza lalo.
Lalithi nxa umuntu ekhala ngomjombo ngoZibandlela uzwe lithi abantu baduba ngokudla imali kungani ngumuthi weqolo abawusela ngenkezo.
UMpalakazi yinyanga elomoya wayo ovunguzayo wokupha lokuthelela abantu umfutho wokudla imali.
Mhlawumbe abantu bayabe sebethabela lokuthi umnyaka susiyaphela bengabaphilileyo kutshengisa lokuthi iminyaka yabo yokuphila iyengezelela, ufica kusosiwa ngapha langapha abanathayo ufice sebekhame imbodlela benatha obesikhiwa bona budula.
Umuntu uyabe ejwayele ukuzinathela iqhaga lengwebu elihambelana leholo lakhe umfice eklamasa esekhuluma lesilungu ngapha esejunqula abanye baze batshintshe lendawo zokunathela bangene emahoteleni okubhadalwa khona emnyango.
IKhisimusi lomnyaka omutsha kungedlula sekuvulwa izikolo uthole umuntu esemdambiyana imali zingaseneli, atshitshe umuntu esesiyabolekana lemali ezalayo kubomatshonisa abanye bazebacine besehluleka ukuyibhadala bathathelwe impahla zendlini ezifanana lesitofu kumbe umaqandisa.
Phela labomahotsha bathi yisikhathi sabo sokwenza imali ngoMpalakazi ufice umuntu omdala olonkosikazi labazukulu enqumanquma labomangumba ebabhadala lokuthi kumkakhe uyabesesoleni kwazi yena.
Lemikhuhlane eminengi bayayithapha abantu bavike ngokuthi bebenathe kakhulu.
Ungabona lokhe uphindaphinda amaphutha akho minyaka yonke kungcono uyekhulekelwa mhlawumbe kuyabe sekulidimoni elizakwenza ukuthi uzonde uZibandlela ngenxa yokungahleleki komuntu.
Ayixabene!
Online Reporter