Online Reporter
Ethel Ncube
IQEMBU leNsimbi zeZhwane lizafaka uzulu esitayileni ngokukhipha idlalade labo elitsha ekuqaleni kukaLwezi eSouth Africa.
Idlalade leli lilengoma ezingu-7 njalo lilesihloko esithi, Zimbiwe yinsele yazilinda, lizaqala ukwethulwa eMzansi kuthi mhlaka 8 Lwezi lethulwe emzini wamaKhosi, koBulawayo.
Okhokhela iqembu leNsimbi zeZhwane uBrema, ubike ukuba konke kuhamba ngomumo, imbiza isivuthiwe.
“Bafowethu, yonke into ihamba kahle, sesilungiselele sonke lequla lami. Sizabe siseBaseline eMzansi uLwezi eqala sisethula idlalade lethu elitsha. Idlalade leli lilengoma ezithi Ifolosi, Umthobanhliziyo, Ingezamanxeba, Inkemba, Ulibofuzo, Umambule lethi Zimbiwe yinsele yazilinda yizo ingoma esizazethula bakwethu.
“Siyabe sikhona siphelele sonke labafana, akula ozabe engekho kubafana bami sisethula umculo wethu. Lizazizwela, yibunandi bodwa esiza labo eGoli,” kubika uBrema.
Uqhubekele phamili eveza ukuba abalandeli bomculo kumele baze ngobunengi babo.
“Balandeli, asibuyeni sonke ngobunengi bethu, lihlala lisitshengisa uthando ngezikhathi zonke, wozani lizosisekela njalo.
Sicela bonke abafisa ukuza emcimbini lo babuye belande injongo eyodwa yokuzolalela umcimbi hatshi ukufika badale umsindo.
Lokhu kucina kungcolisa abaculi bona bengelacala, asizameni ukwekela indaba zomsindo sisebenze kuhle ngokuthula, siyalicela bakwethu. Asidibaneni khonale eMzansi mhlaka 1 kuLwezi siyebona iNsimbi zeZhwane balandeli, ukutshelwa yikuncitshwa,” kuphetha uBrema.
