Online Reporter
Ethel Ncube
AKUBIZWA ozwayo esidikidikini seTsholotsho lapho iqembu leNsimbi zeZhwane elizabe lijabulisa uzulu kuthakazelelwa ilanga likaZibuse.
Ilanga likaZibuse eMatabeleland North lizathakazelelwa eTsholotsho lonyaka.
UManeja weqembu leli uBahlanu Sibanda ubike ukuba iqembu labo lithembisa uzulu uluju kuphela mhla kuthakazelelwa uZibuse.
“Okokuqala ngithanda ukubonga ukuba siphiwe ithuba lathi elokuthi siyetshaya umculo wethu ngakithi eTsholotsho.
Iqembu leNsimbi zeZhwane lidabuka eTsholotsho kungakho siyabe singekhaya sithakazelela uZibuse kanye lozulu wonke oyabe ekhona. Sizabe sijabulela lelilanga sikhumbula abalweli benkululeko abenza sathola uZibuse esilaye khathesi.
“Emcimbini lo sizathola ukuba sihlangane labanye abahlabeleli abadala kulathi ngomculo lathi silakho ukusuka sesifunde okunengi kibo. Ukuhlangana sijabulela uZibuse kuzakwenza sithole amanye amathuba okwaziwa ebantwini abanengi abatshiyeneyo labahlala besizwa ingoma zethu bengakaze basibone mathupha bazahle bathole ithuba lokuthi basibone khonapho,” kubike uBahlanu.
Uqhubekele phambili enxusa ukuba amaZhwane wonke abuye emcimbini.
“Nginxusa uzulu wonke ikakhulu abaseTsholotsho ngithi phakamani ngobunengi benu lizosisekela singabafowenu, buyani sikholise ndawonye. Silengoma yethu entsha ephumileyo sizalizwisa yona futhi lingaphuthelwa yibunandi. Siphethe ezikhala kamnandi, wozani lonke lizozizwela lizibonele,” kuphetha uBahlanu.
