Online Reporter
Zimpapers Sports Hub
IZAVUTHA njalo inkundla yeWhite City sekuqhutshwa umjaho weBaldmin Bulawayo Half Marathon, okhangelelwe ukuthi ubekhona ngoMgqibelo.
Lo ngumncintiswano omkhulu kulelidolobho nanko kukhangelelwe ukuthi kuphatheke abantu abedlula ikhulu.
Umjaho lo uphenduka kukhalenda yokugijima kuleli ngemva kokumiswa ngo-2015, ngesikhathi usasekelwa yinkampani yeCoca-Cola. Ubalelwa kumincintiswano ethathelwa phezulu zintshantshu zokugijima imango emide kuleli lokuthi unikeza izakhamizi zakoBulawayo ithuba lokusekela umdlalo nanko phela kuzagijinywa phakathi kwamalokitshi athile, aseduzane lenkundla yeWhite City.
Abaqoqi bomncintiswano, babikele iZimpapers Sports Hub ukuthi ukubhalisa ukugijima kuzavalwa ngoLwesihlanu. Kubikwa lonyaka kuzabe kulabagijimayo abavela kwamanye amazwe.
Okhokhela iqula lekhomithi yabaqoqi bomjaho, uThemba Mhlophe uqinisekise ukuba amalungiselelo abo ahamba kakuhle okwakhathesi.
“Usukhona umdlalo wethu omkhulu, ngemva kwesikhathi eside ungekho. Sithanda ukwazisa labo abazafuna ukugijima ukuthi ukubhalisa kuvalwa ngoLwesihlanu mhlaka 18 Mabasa ntambama, ngakho labo abangakenzi lokhu, sibakhuthaza ukuthi bakwenze ngokuphangisa.
“Silethemba lokuthi kusiyatshona ilanga ngoLwesihlanu, inengi labantu lizabe selibhalisile njalo yikho lapho esizanikeza abazagijima izikipa zabo,” nguMhlophe lo.
Ugcizelele ngomthelela obanzi walumjaho, ikakhulukazi ekuvuseleleni isiko lezemidlalo koBulawayo, ngemva kweminyaka ungaqhutshwa.
“Umjaho lo ulithuba lokuhlanganisa umphakathi, ukukhuthaza abantu ukuthi baphile impilo engcono njalo batshengise ukuqina kwemidlalo eqhutshwa koBulawayo. Idolobho leli liyindawo yokulolonga ithalenta kwezokugijima, njalo umjaho lo uzakuveza lokhu,” kutsho uMhlophe.
Uthe ekuqaleni komnyaka, bebebalutshwane abantu ababhalisileyo kodwa uthe balokukholwa ukuthi iviki isiyaphela, kuzabe kulabantu abanengi.
“Siyazwisisa ukuthi abantu bavame ukulinda kuze kube sekucineni ukuthi babhalise, kodwa sibone utshintsho kumalanga adluleyo, inengi selibuya ukuzobhalisa.”
Kusenjalo, ukhona omunye umjaho ozayo eWhite City ngoNtulikazi, owe-Queens with Wigs, onxusa abesifazane kuphela. Kuzancintiswana kumango ebalisela i3 000m, 100m hurdles, 100m, 50m, 1 500m, 4×100m relay, 400m, 800m, 200m lemidlalo yokweqa lokujika.
