Online Reporter
Sukulwenkosi Dube
UGATSHA lweNational Social Security Authority (NSSA) lunikeze imbuzi kulabo kuzakhamizi esezathatha umhlalaphansi esiqintini seMagedleni eGwanda, esabelweni seMatabeleland South.
Izakhamizi lezi zithole imbuzi zohlobo lweMatabele, amaBoer angu-60 kunye lamazinyane angu-23.
Abahola ipentsheni abangu-38 sebethole usizo kuloluhlelo oluhlose ukuphakamisa impilo zalabo asebethatha umhlalaphansi. Okwakhathesi, uhlelo luqhutshwa eGwanda laseBindura.
Sekwakhiwa izibaya eziyisithupha zembuzi, idibha lesibholane esisebenza ngamandla elanga.
Umgcinisihlalo wohlelo esiqintini seMagedleni, uMnumzana Bani Dube, uthe udubo seluzaphela.
“Ukunikwa kwethu loluhlelo kutsho ukuthi sesilakho okungasinikeza imali. Lokhu kuzasisiza kakhulu njengoba imali ebesiyithola eyepentsheni ingeneli. Sibonga iNSSA ngalumsebenzi. Sizathengisa imbuzi bese sihlukaniselana imali.”
Umgcinisihlalo weNSSA, uChristopher Dube uthe:
“Ngimele iNational Social Security Authority (NSSA), ngizizwa ngiphakanyisiwe ukunikeza uhlelo lokufuywa kwembuzi kuleli thimba labahola impentsheni. Njengo gatsha oluphiwe umlandu wokukuthi luqinisekise ukuvikeleka kwemali yebasebenzi, sabona isidingo sokuhlola indlela ezintsha zokuthuthukisa impentsheni yethu.
“Inhloso ingeyokudinga indlela zokuziphilisa, ngaleyo ndlela kwandise izinga lempilo yabo. Iphurojekthi yembuzi itshengisa ukuba izakuba lempumela ethembisayo, lokudala indlela yokuthola imali kwabahola impentsheni.”
UMnu Dube uthe bazaqhubeka bencedisa izakhamizi ezingaphansi kohlelo, lezinye ezizathola ulwazi. Uthe kuzaqhutshwa lenhlelo zokwabelana ulwazi ngebhizimusi lokufuya imbuzi.
