Online Reporter
YiNtatheli kaMthunywa
KULESIMBAMGODI esileminyaka engu-23 yokuzalwa esibonga amadlozi akwabo ngemva kokuqeda insuku eziyisitshiyagalombili ngaphansi komgodi othi waba sesimeni esinzima kakhulu nanko wake waba sesilingweni sokuthi adle ingcekeza yakhe yangaphandle ukuze aphile.
UPardon Ruvengo, oyisisebenzi eGuernsey Gold Mine eGoromonzi, uchaze ngobunzima abhekana labo phansi emgodini ngeSonto ngemva kokukhitshwa esibhedlela lapho abelaliswe khona insuku ezintathu.
Wakhitshwa emgodini ephila, kodwa omunye ayesebenza laye oleminyaka engu-21 uInnocent Mhere, wedlula emhlabeni engakatholi usizo.
Umnawakhe kaRuvengo, oleminyaka engu-18 uKudakwashe Junior wenelisa ukubaleka umgodi ungakadiliki.
“Ngiyakukholwa ukuthi uNkulunkulu ulesizatho sokungipha elinye ithuba lokuthi ngiphile,” kutsho uRuvengo.
Uthe engaphansi emgodini wayengasasazi isikhathi, wayengazi ukuthi kusemini kumbe ebusuku. Kungelakudla kumbe amanzi ahlanzekileyo, uthi yena loMhere bakhetha ukuthi bathambisele egabheni elincane banathe ukuze baphile.
“Ngabona umngane wami esedlula emhlabeni eceleni kwami. Ngaphosa ngadla ingcekeza yami yangaphandle ukuze ngiphile,” kutsho uRuvengo.
Ubuye wachaza ngamaphupho akhe lapho ayebona izihlobo zakhe kunye lasebenza labo bebumba amacebo okumsiza.
“Kuyamangalisa — ngumusa weNkosi. Ngithemba uNkulunkulu ulesizatho ngokuthi ngisile kungozi efana lale yokudilikelwa ngumgodi.”
Izisebenzi zesibhedlela zijabulele ukusinda kwakhe ezinye zathatha imifanekiso laye esephuma esibhedlela.
Ngakibo esigabeni seMunorwei Village ngaphansi kwenduna uBota eZaka, izakhamizi kubikwa zilokhu zibuthene njalo zilokhu zingakukholwa ukuthi uyaphila.
“Abantu bonke ekhaya lokhe bengakakukholwa ukuthi uPardon uyaphila,” kutsho uyise, oleminyaka engu-47 uKudakwashe Ruvengo. Uthe unina kaPardon, obephathekile emoyeni, ubengcono esekhulume lendodana yakhe.
“Sikhuluma nje izakhamizi zibuthene ngekhaya zilinde ukuthi zibone isimanga lesi. UNkulunkulu nguye onika impilo,” kutsho yena.
Uyise uthe imuli yaziswa ngengozi le ngumnawakhe kaPardon, owenelisa ukuphuma umgodi ungakadiliki. Kubikwa osakhulayo lo wayesesebenza lomnewabo emgodini ukuze athole imali yokuqhubekela phambili ngezifundo zakhe ngemva kokuphuma kuhle kumihloliso yakhe ye-Ordinary Level.
URuvengo, olizibulo emulini yabantwana abahlanu uthi kasafuni ukubuyela ekwembeni igolide. Uthe ufisa ukuba athathe ichence afundele ukusebenzisa imitshina.
“Ngithanda ukubonga uNkulunkulu, engisebenza labo, abangane bami lezihlobo kunye lezisebenzi zePacific 24‑Hour Hospital ngokusetshenziswa nguMdali wami ukuthi ngisinde.”
