Online Reporter
YiNtatheli kaMthunywa
IMULI ehlala eMabvuku eHarare ikhala ngokuthi ilohlupho lwendodakazi eleminyaka engu-19 yokuzalwa okubikwa ingaya ngaphandle icina isisidla ingcekeza njalo lokhu kubikwa sokuleminyaka kusenzakala.
UNkosazana Angeline Mukodzeri (38) onguye ozala lumntwana uthi bathwele nzima ngohlupho lolu njalo indodakazi yabo le yazalwa ilamalunga omzimba angasebenzi kuhle.
“Umntwana lo ngomunye wabantwana bami ababili. Abantwana laba ngabazala lendoda yami, uNorest Mazinyani, laye owangibalekela ngenxa yalobubunzima, sacina sesitshiyana ngathathwa ngomunye ubaba engihlala laye lapha ekhaya. Ngibonga uMdali ukuthi lubaba engilaye wangamukela labantwana bami kuhlanganisa lalo ogulayo,” kutsho uMaMukodzeri.
Bathi indodakazi le bake bayihambisa ezibhedlela kodwa bacina besehluleka ukuqhubeka behamba ngokuya kwesikhathi.
“Ngatshada lomyeni wami wakuqala sihlala eGozo, ngaphansi kwenduna uMangwende, eMurehwa lapho engasizwa khona ngabantwana bami ababili laba. Ngenxa yokuthi ngiphila ngokucela, ngiyake ngiphume ngihambe laye lo ogogekileyo ngimfake phakathi kwe-wheelchair sihambe sicela ebantwini abahamba ngezimota,” kutsho uNkszn Mukodzeri.
Bathi umntwana lo kathandi ukukhuluma njalo uyahlukuluzeka ngokuhamba.
“Umyeni wami wakuqala wathi esengitshiyile ngasuka ngaya eHarare labantwana lapho engihamba ngicela khona imali ngihamba lalumntwana. “Kwesinye isikhathi ngiyathola ama piece-job ngitshiye ngimkhiyele endlini yikho lapho engimfica esenze ingcekeza wayidla. Umntwana lo uyayidla ingcekeza lami ngize ngizwe ubuhlungu ngibona uyabe eselambile ngoba eqinisweni ukudla kuyasilela ngekhaya,” kutsho uNkszn Mukodzeri.
Uthe udinga ukusizwa ngokudla, impahla zokugqoka, isepa, amapampers kanye lemali yesikolo yendodakazi yakhe encane eleminyaka elitshumi lasithupha.
“Kusukela ngatshiyana lobaba wabantwana, akulamuntu ongisizayo emulini yabantwana laba ngaphandle komyeni wami omutsha uPardon Arufeya (38) logogo wami.
“Khathesi sengihlutshwa liqolo ngenxa yokuthwala umntwana lo ngiyamthwala ngimuse phandle ngiphinde njalo ngimbuyisele endlini. Lanxa simfaka ku-wheelchair yimi engimthwalayo. Umntwana lo ulemithi ayidingayo ukuthi aphiwe, yona engingelayo ngenxa yokuswela imali,” kutsho uNkkz Mukodzeri.
Kulabo abafuna ukusiza umntwana lo bangamtshayela kunombolo ezithi 0777 060 680 kumbe u-0782 895 574.
Ugogo uMary Arufeyo (72), osenguninazala kaNkszn Mukodzeri uthe umakoti wabo bamamukela labantwana bakhe ababili.
“Badla nje esikudlayo lanxa omunye umntwana lo eswela okunye okokudla okumfaneleyo ngenxa yokuswelakala kwemali.
“Liqiniso ukuthi umntwana lo udla ingcekeza yakhe, kasazi ukuthi yindlala yini kumbe yinkinga ekhona,” kutsho uGogo uArufeyo.
Umntwana lo wayehamba esikolo kodwa ngenxa yokusweleka kwemali wacina etshiyile.
