“Intsha kumele iphakamise umnotho welizwe”

Dr Evelyn Ndlovu

Nkosilathi Sibanda

UMPHATHINTAMBO wogatsha lwe-Environment, Climate and Wildlife, Honourable uDokotela Evelyn Ndlovu usekhuthaze abafundi emakolitshini ukuthi bakhuthalele ukuthola ubungcitshi lolwazi oluzaphakamisa inhlelo zomnotho welizwe.

UDkt Ndlovu wethule inkuthazo le ngesikhathi esekolitshini leNgamo Livestock Farm and Vocational Training College eTsholotsho ngeviki edluleyo.
Uthe nxa abafundi sebeqede izifundo zabo kumele basebenzise amathalenta, ubungcitshi lokuhlakanipha kwabo ekusunguleni izinto ezintsha ukuze banikele ekuthuthukisweni lokukhulisa umnotho welizwe.

Andubana kuqalwe umkhosi wokunikeza izithupha kubafundi, kuhlanyelwe izihlahla, kulandelwa indikimba ethi: “Ukuqinisa Intsha: Ulwazi lokusungula okutsha njengezisusa zokukhula komnotho.”
Umphathintambo uDkt Ndlovu uthe:

“Ngibeka ingqobe kubafundi abaqede izifundo ukuthi babe yizithunywa zolwazi, abafundi abaqhubeka impilo bedinga ulwazi, abakhi belizwe.
“Ngibakhuthaza ukuthi baxazulule inkinga ezibhekane leZimbabwe ngokusebenzisa ukusungula izinto ezintsha lokuvula amabhizimusi.”