Online Reporter
Nkosilathi Sibanda
ITHEMU lesibili kwezemfundo liphethe kakuhle kubafundi beCharlestone Primary kulandela ukuba zintshantshu zomdlalo wethenisi ilizwe lonke.
Abafundi laba, uSibusiso Sibanda, Passion Chigumira loMbalenhle Maphosa batshengise ukuthi balesiphiwo kulumdlalo ngokukhokhela kumincintiswano yeNational Association of Primary School Heads (NAPH) eqhutshelwe edolobheni leMarondera ngenyanga edluleyo.
USibanda, oselodumo ngokunqoba abanye kusigaba sama-Under 12, uthole imendulo yegolide kuhlandla labafana. UMaphosa loChigumira bathole umvuzo wemendulo yesiliva.
Bonke abadlali laba bebemele isabelo sakoBulawayo.
USibanda, esuka kulumncintiswano uzamela iZimbabwe kumidlalo ye-Under 12 Southern Region Tennis Tournament eMozambique mhlaka 10 kusiya fika umhlaka 14 Ncwabakazi lonyaka.
Kuminyaka edluleyo, iCharleston Primary isilolonge inengi labadlali asebethole igolide kumidlalo yeNAPH.
Kumbiko ovele kulesi isikolo ngoLwesine, kubongwe umsebenzi kamqeqetshi uRaphael Chekure.
Amhlophe kumqeqetshi uMnu Chekure. Sibonga ukuzimisela kwakhe ekulolongeni intshantshu lokukhokhela i-academy yethu yomdlalo wethenisi. Sibonge njalo loMnu Tenda umqondisi wesikolo ngokusekela ithimba labadlali, kutsho umbiko lo.
UChekure, ekhuluma leZimpapers Sports Hub uthe: Lo ngumsebenzi omuhle olwenziwe nguSibusiso Sibanda, Mbalenhle Maphosa loPassion Chigumira labo bonke abadlali bethenisi eCharleston Primary.
Ukusebenza gadalala ngesikhathi sokulolonga kubhadale. Ngifuna ukuthi abadlali bonke benze kuhle, behambe lawo lumdlalo, bawusebenzise ukuze utshintshe impilo zabo kwelingcono kusasa. Ngosekelo esiluthola kubazali, ngeke sibuyela emuva.
