Siphakeme .Mnindwa
YiNtatheli kaMthunywa
NGENXA yobukhwele kulendoda eleminyaka engu-23 yokuzalwa yeChitungwiza eyehluleka ukuzikhuza yatshaya yaze yasika intombi yayo isitho sangasese ngengqamu ngemva kokuyifica isemoteni lenye indoda, egwetshelwe ukupika ejele inyanga ezingu-18.
Umantshi weChitungwiza kulelicala uAlois Midzi ubenqume ukuthi uInnocent Sean Jiyengwa ayehlala ejele inyanga ezingu-24 kodwa ucine emesulela inyanga eziyisithupha kukhangelelwe ukuthi angadali icala elifanayo kuminyaka emihlanu ezayo.
UJiyengwa utholakale elecala lokulimaza intombi yakhe, eleminyaka engu-25 ehlala ku Unit L eChitungwiza.
UJiyengwa wetheswe icala lokuhlukuluza eleDomestic Violence Act.
Umtshutshisi uMnumzana Malvin Mwendera ubikele inkundla ukuthi mhlaka 29 Mpalakazi ngomnyaka ka2024 ngezikhathi zantambama, uJiyengwa wabona umamangala ehlezi emoteni lenye indoda wazonda wagana unwabu.
Kubikwa uJiyengwa weqela phezulu kwebhonethi lemota wasebulala ifasitela laphambili ngenxa yokuthukuthela.
Indoda eyayiphakathi yamvumela ukuthi angene yena wafika waqala ukutshaya umamangala ngezibhakela lamampama.
UJiyengwa walaya umamangala ukuthi baye endlini yakhe wafika waqhubeka ngokumtshaya ngempahla egoqela izimbiza, amapani, izitulo zepulasitiki lokunye.
“Wangidabulela impahla, wangilaya ukuthi ngilale ngikhangele phezulu wasika inyama kusitho sami sangasese esebenzisa ingqamu yemkulwini. Ngizwa ubuhlungu njalo lasengqondweni ngikhathazekile ngoba abantu sebesithi ngingumahotsha odibanisa amadoda,” utshonjalo.
Uthe indoda ayelayo ngumngane kaJiyengwa owayemphathele ijazi lakhe ayelitshiye ngosuku lweKhisimusi.
Uthe waphunyuka wayabikela amapholisa ngesikhathi uJiyengwa ephume phandle eyedinga okunye okokumtshaya ngakho. Uthe uJiyengwa wabuye wamtshontshela imali engange US$193. Incwadi zesibhedlela kunye lezithombe azithathayo esanda kulimala yizo ezisetshenziswe njengobufakazi emthethwandaba.
Online Reporter