Siphakeme .Mnindwa
Bhekimpilo Tshalibe
KULENINA elileminyaka engu-60 leNketa 7 koBulawayo elimiswe emthethwandaba weWestern Commonage ngeviki ephelileyo lisetheswa icala lokuthela umalukazana walo ngamanzi abilayo entanyeni limethesa icala lokuthi uyaloya.
Umtshutshisi, uMilton Moyo, utshele inkundla ukuthi uBabra Mpofu wetheswa icala lokulimaza umamangala, uMartha Sibanda ngokumthela ngamanzi atshisayo entanyeni.
Kubikwa mhlaka 18 Zibandlela, umamangala wayevakatshele ijaha lakhe kodwa unina walo, uBabra Mpofu, uthe esephuma, wamtshaya ngenkomitsho andubana amthele ngamanzi atshisayo entanyeni wabuye wamgijimisa esithi uyaloya.
Umantshi uqume ukuthi umsolwa aphenduke emthethwandaba ngoLwesine.
Kusenjalo kulamadoda amabili angabangane eMganwini, koBulawayo agwetshelwe ukuyapika iminyaka engu-15 ejele ngamunye kulandela ukutholaka elecala lokutshintshana ukudlwengula umntwana wesikolo oleminyaka engu-14.
Umtshutshisi uNkosazana Manyika utshele inkundla ukuthi abasolwa bethusela umamangala ngengqamu basebesiya mdlwengula.
Kubikwa umhlaka 16 Mpandula 2024, uBrian Mvere (19) lo Sherperd Msipha (24) bamisa umamangala endleleni evela esikolo. Umamangala wazama ukubaleka, uMvere wamgijimisa wambamba wasekhipha ingqamu wamethusela ngokumgwaza.
Ababili laba badonsela umamangala lapho okuhlala khona uMsipha lapho abamdlwengula khona betshintshana.
Umantshi weWestern Commonage regional court, uNkosikazi Sibongile Marondedze uthe ababili laba bayingozi emphakathini kungakho kumele bayebhadla ejele isikhathi eside.
“Abantu abahlukuluza abantwana kumele benqatshelwe ngokuthi kuvikelwe abantwana abangamankazana.”
Uthe ababili laba bazakuyapika iminyaka engu-15 ngamunye.
Online Reporter