Online Reporter
Nkosilathi Sibanda
AMADODA eBeitbridge amathathu abopha iqhinga lokungabhadali umthelo wemota, asezisola nanko phela asegwetshwe ukuhlala ejele okwenyanga ezilitshumi lanhlanu.
UTumelo Moyo (24), Vusa Mbedzi (39), loEdson Muleya (43) bamiswe phambi kukaMantshi lapho inkundla ebikelwe ukuba bephula umthetho ngokungenisa elizweni imota yohlobo lwe-Isuzu D-Max ebhaliswe eSouth Africa, bengazange babhadale umthelo wokungenisa impahla.
INational Prosecuting Authority of Zimbabwe ibike ukuba amadoda womathathu la asebenzisa iphasipoti yeSouth Africa, bathola iTemporary Import
Permit ngobuqili, baze bafaka lama-number plate ogunyathi, kuhloswe ukufihla ukuthi imota le kayisiyo le ebhalwe ephepheni.
Amapholisa kunye lezisebenzi zeZIMRA athola ukuthi imota le kayikaze ibhaliswe elizweni njalo umthelo wokungenisa ubungekho.
Ekubekweni kwesigwebo, uMantshi uveze ukuthi i-Isuzu D Max izabekwa ezandleni zikaHulumende.
INational Prosecuting Authority of Zimbabwe ibeke isixwayiso sokuthi ngeke sibelula isigwebo sika loba ngubani ozama ukwephula umthetho wokungenisa impahla elizweni.
“Ukweba impahla ngokungabhadali imithelo kubangela ukulahleka kwemali yelizwe, kuphazamise ukuphepha kwemingcele, njalo yikwephula umthetho.
Umphakathi ukhuthazwa ukuthi zonke izimota ezingeniswa elizweni kumele zihlolwe, zibhaliswe ngokusemthethweni, njalo kube lesiqinisekiso sama- plate, inombolo yesisekelo semota (chassis) lenombolo yenjini, kuhlolwe ngokusemthethweni.
