adminMsilisi Dube
BABUKELE ibhayisikopo yamahala abathengisi beGodini koBulawayo ngoMvulo ntambama kuyonale iviki ngemva kokuba elinye inina liwele phansi laqaleka ngesikhathi libanjwe xhaka litshontsha impahla ebiza $4 kwesinye isitolo samaChina esikuLobengula Street.
Inina leli elivezwe ngokuthi nguSihle Mkhwebu elicatshangelwa ukuba lingaba leminyaka yokuzalwa engu-38 njalo lihlala eOld Pumula litshontshe amasokisi lezinye impahla ezincane laphuma libaleka esitolo lesi.
Unogada wakulesi sitolo kubikwa usoliswe yikuphuma kwenina leli ligijima ngakho walisekela.
Kubikwa unogada uze walibambela emarobhothini ku 6th Avenue selidonsa nzima.
Unogada uchazele uMthunywa kabanzi wathi inina leli ulinanzelele ngesikhathi esetsha izikhwama zabathengi.
Uthe inina leli lithe ngokubona ukuthi selinanzelelwe liphume ligijima esitolo lesi.
“Ngithe ngokucela ukubona isikhwama sakhe uvalo lwahle lwamtshaya lwameqa waphosela phansi impahla akade ezitshontshile wasesuka ngesiqubu,” kulandisa unogada wakulesi isitolo.
“Ngimgijimise ngayambambela emarobothini. Uwele phansi waqaleka waze waphaphama ngemva kwesikhathi esithile. Simthathele lezompahla samekela ngoba engumuntu omdala njalo elomkhuhlane weBP,” kuchaza lunogada.
Inina leli lithe libuzwa ukuthi kungani litshontshile lizame ukucatsha ngomunwe lathi liphethwe yimimoya yamadimoni.
“Angikwazi ukuba bengingenwe yini. Ngibone sengitshontshe impahla lezi. Ngicela lingixolele bakithi ngiyazigulela.
“Indoda yami iyangihlupha endlini. Ngalahla i$50 yakhe ngakho uhlala engithonisela yona nsukuzonke ngakho yikho bengifuna ukuthengisa amasokisi la ukuze ngimbhadale,” kulandisa inina leli.
Online Reporter