Vusumuzi Dube
Lovemore Dube
UMDLALI we-boxing uWezi Chirwa usehlose ukuthi angene kubanga eliphezulu lalabo abaholiswayo kuviki elizayo eSouth Africa.
Uzakulwa loManqoba Magubane oweMzansi, oncintisa kubanga le-lightweight, kumdlalo wobungane kumahlandla ayisithupha esitikini.
Umdlalo lo, uChirwa uzawusebenzisa ukuthi aqanse aze afike lapho okungathiwa usevuthiwe alwele isicoco.
Uthe amalungiselelo ahamba kuhle njalo ukhangelele ukuthi ancintisele ukunqoba, enelise ukukhuphuka kubanga akulo.
“Ngisebenza gadalala, ngiphathiswa yinzalo yekhaya uXolani Moyo eExtreme Gym. Ngizizwa ngikubanga lokuqina lokulunga ukuthi ngingene esitikini, ngibhekane laye,” kutsho uChirwa.
UChirwa uqale ngo-2012 ngemva kokuhugwa ngumngane u-Admonish Mthunzi ukuthi bayebona okwenzakala kwenye i-gym eGwanda.
“Sasifuna i-wrestling, sasingabafana abancane, siyibona isithokozisa, sathola ingekho kulabezenqindi kuphela, yikho ukuqala kwethu umdlalo lo. Sengilwe kanengi njalo ngatshaywa ngabayisithupha kubanga lama-amateur ranks, ngawisa abalitshumi kumidlalo eyi-57,” kutsho uChirwa.
UChirwa uzelwe eGwanda wakhulela khona njalo useleminyaka eyi-25.
Ufunde eSonondo Primary School wasesiya eGwanda High School eqhubekela phambili ngomdlalo.
Isifiso sakhe yikuthi aphakamise idolobho leGwanda lomdlalo wenqindi.
“Ngifisa ukuthi ngikhule kulumdlalo ngikhuthaze abasakhulayo ukuthi umdlalo ungabaphilisa, ngakho-ke kumele ngisebenze gadalala ngibeyintshantshu,” kutsho uChirwa.
Umdlalo lo esabelweni seMatabeleland South ubungela ntshantshu ngemva kokuhlala phansi kukaDestroyer Bonyongo loLotus Dube abama1990.
UChirwa, ongumunye wabambalwa asebethe basukumisa umdlalo lo kuminyaka elitshumi edlulileyo benqoba kumaYouth Games lakuma amateur.
Owayezibambile kumdlalo lo esedolobheni leGwanda uMaculoamahle Nkomo, ulokuthokoza ukuthi ezenqindi zilokhe zisiyaphambili.
Yena sowaphamamiswa wayasebenzela esigodlweni eHarare lapho akhangele khona imarketing lemedia kunhlanganiso yeZimbabwe National Board of Boxing and Wrestling Control.
Online Reporter