adminCornelius Luphahla
ABAFUNDI beFaith College sebephendule ikolitshi leli ibhawa nanko phela kulabanye babo abatholakale bekhelela amasese ekilasini kukanti njalo kubikwa ukuthi abanye babo kabalugxobi esikolo bekuma-vuzu party.
Isiga lesi kubikwa senzakale ngoLwesihlanu kuviki ephelileyo lapho abafundi abathathu abatholakale benatha utshwala ekilasini okucatshangelwa ukuthi abanye babo basuke esikolo ekuseni baya ku-vuzu party ebiselokitshini leKhumalo, uMthunywa ukuzwile lokhu.
UMthunywa ukhulumisane lomunye umfundi ongathandanga ukubethwa ngegama wathi abafundi laba batholakale ekilasini engafundeli muntu bakhipha ingqamu befuna ukugwaza umbalisi.
“Abafundi laba batholwa ngumbalisi ekilasini engafundeli muntu ngemva kokuba ezwe bebanga umsindo njengoba basebedakiwe. Abafundi labo babebathathu uFomu 1, Fomu 3 lokuFomu 4 njalo bathi bebona umbalisi lo bakhipha ingqamu.
“Wathi efika kibo babaleka wayabikela umnikazi wekolitshi wahle wabaxotsha kodwa omunye wabo lokhe ebuya esikolo noma nje engangeni ekilasini. Thina lokhu akusimangalisanga ngoba utshwala lobu babuthenga ebhawa eseduzane lesikolo njalo bahlala bedakiwe,” kutsho umfundi lo.
Omunye njalo umfundi ofunda uFomu 4 kulelikolitshi ubikele intatheli ukuthi abanye abafundi balapha ababuyanga esikolo ngoLwesihlanu beku-vuzu party.
“NgoLwesihlanu kulabanye abafundi abafunda uFomu 3 abangabuyanga esikolo kwathi abanye basuka ekuseni baya ku-vuzu party eyayiselokitshini leKhumalo okuhlala khona abanye abafundi. Lokhu vele kuhlala kusenzakala njalo omunye umbalisi uyakwazi.
“Okwenza singakhulumi yikuthi umnikazi wesikolo uMaphosa wathi ozakhuluma ngezigigaba ezenzakala esikolo uzamxotsha,” kutsho umfundi lo.
Esinye isakhamuzi esilomntwana ofunda kulelikolitshi esiziveze ngokuthi nguMakoni sithe sibuhlungu ngoba umnikazi wesikolo lesi uhlala exotsha abantwababo ngezikwelede ezincane kodwa esehluleka ukukhuza abantwana.
“Mina okungizwisa ubuhlungu yikuthi uMaphosa kazwisisi nxa ulesikwelede esikolo ungaze umcele ukuthi angaxotshi umntwana uzabhadala uyamxotsha kuphela. Umxotsha khonapho esesesikolo esazi ukuthi uyabe engasela mali yokugada njengoba uyabe esuke ngebhasi yesikolo kulokuthi ahle amgadise ibhasi.
“Okunye njalo abantwabethu abaphumeleli kuhle ezifundweni asazi kumbe yikuthi esikolo lesi akulamthetho njengoba benatha lotshwala esikolo,” kutsho uNkszn Makoni.
UMthunywa ukhulumisane lomnikazi walelikolitshi uMnumzana Milton Maphosa wathi indaba enjalo kayazi, abantu baqamba amanga.
“Indaba yabafundi ababenatha utshwala ekilasini kasiyazi njalo akulabafundi akade bengekho esikolo ngoLwesihlanu. Okunye njalo kulelikolitshi siyakhuthaza abantwana ukuthi bengahlanganyeli lama-vuzu party ngoba engababulalela ikusasa labo. Abantu abakhuluma kubi ngekolitshi leli balamanga sibili njalo akulabhawa eduze lekolitshi,” kuphetha uMnu Maphosa.
Online Reporter