admin
Cornelius Luphahla
ZIBAMBE oluphuphumayo izakhamizi zesigabeni seDlawa eNkayi ngemva kokuba esinye isakhamuzi sakule indawo sibhaxabule umalukazana waso ngemvubu ethi ugqoke kubi emzini wakhe.
Isisanasana lesi senzakale ngoLwesihlanu kuviki ephelileyo lapho uMnumzana Thulani Mthethwa abhaxabule khona umalukazana wakhe uNkosazana Lydia Ndlovu othethwe nguMnumzana Philile Mthethwa ethi ugqoke isiketi esifitshane kakhulu.
Kuzwakale ukuthi uMnu Mthethwa uthe ngemva kokutshaya uNkszn Ndlovu wamxotsha ethi kabuyele ngakibo ngoba ngeke ahlale lomntanakhe ngoba kalamthetho.
Intatheli ixhumane loNkosazana Lisca Masuku oyisakhamuzi sakule indawo wathi yena wathola uMaNdlovu elokhu ehlengezela inyembezi abantu bemgombolozele ngemva kokumlamulela.
“Mina ngezwa umkhosi komakhelwane ngagijima ngathola uMaNdlovu ekhala ethi utshaywe nguyisezala. Ngathi ngikhangela ngathola exathukile embaleni kanye lemhlane ethi uyisezala umtshayele ukugqoka isiketi esifitshane wathi ugqoka okwebele lendlela.
“Into engimangalisileyo yikuthi ngemva kokumtshaya kwakhe uhle wamxotsha wathi kasamfuni emzini wakhe, nxa umntanakhe esamfuna kayehlala laye khatshana lomuzi wakhe,” kutsho uNkszn Masuku.
UNkszn Ndlovu ebuzwa ngale indaba uvumile ukuthi yenzakele wathi uzwa ubuhlungu yikho wayibika kusobhuku noma ingakathoniswa.
“Kuliqiniso sibili ukuthi ubabazala wangitshaya ngemvubu ngalimala ethi ngigqoke ubulema. Lokhu kungizwisa ubuhlungu kakhulu ngoba okwenza ngagqoka isiketi esifitshane yikuthi ngangitshiselwa njalo umntanakhe wangithola ngilaso isiketi lesi wangithatha nginjalo.
“Indaba le ngayisa kosobhuku kodwa ayikathoniswa njalo ingathoniswa ngendlela engangijabulisiyo ngizayidlulisela phambili. Ngokubona kwami ubabazala kukhona ayekufuna kimi njengoba umkami engekho yikho wangitshaya esenzela ukuthi ngimesabe manje ngamphendula wasengixotsha,” kuveza uNkszn Ndlovu.
Ebuzwa ngale indaba uMnu Mthethwa uthe okwenza watshaya umalukazana wakhe yikuthi wayedakiwe uzamxolisa.
“Umalukazana wami ngamtshaya sibili kodwa ngaphambanisa njalo okwenza ngamtshaya yikuthi ngangidakiwe ngakho ngizamxolisa mhla ngithonisiswa kosobhuku. Ukumxotsha sibili ngamxotsha kodwa ngesifiso sami ngabe uyaphenduka ngoba kangikwazi ukuthi kwakutheni njengoba ngangidakiwe,” kuchaza uMnu Mthethwa.
Usobhuku wakule indawo uMnumzana Danisa Mthethwa ubikele intatheli ukuthi indaba le uzayithonisa ngoLwesihlanu.
“Indaba kaMthethwa eyokutshaya umalukazana wakhe ngemvubu yamangalwa kimi ngakho ngizayithonisa ngoLwesihlanu kuyonale iviki,” kutsho uMnu Ncube.
Imizamo yokukhulumisana loMnu Philile Mthethwa yehlule ngoba ucingo lwakhe lwalile ukungena.
Online Reporter