adminCornelius Luphahla
KULOMFUNDISI webandla leZinkonjane Church in Zion eliseShabula eLupane obanjwe xhaka emini libalele encinda uluju lwemvelo lenkosikazi yomzalwane wakhe qede wafulathela umuzi wakhe.
Isiga lesi senzakale ngoMvulo kuviki ephelileyo lapho umfundisi uLazarus Mangena abanjwe khona esotha umlilo wemvelo loNkosazana Lindani Moyana umkaMnumzana Mthandazo Moyo esivandeni sephurojekithi esikule indawo, uMthunywa ukuzwile lokhu.
Intatheli ikhulumisane loMnumzana Mkhokheli Dube onguye owafica ababili laba ehamba loMoyo laye ongazange athande ukuphozisa amaseko wahle wahlaba umkhosi abantu babuya bengasadlanga nkotshana umfundisi yena wahle wadliwa ngumswenya.
“Mina ngangisiyathelela esivandeni ngihamba loMoyo ethi ulandela umkakhe kuthiwa usesivandeni. Sathi sisesivandeni ngababona belele ngaphansi kwesihlahla sebhanana ngatshengisa uMoyo, uMangena wahle wavuka wabaleka watshiya uMaMoyana.
“Ngalesosikhathi ngehluleka ukumxotshanisa ngoba uMoyo wahle wasukela umkakhe ngabona kungcono ukuthi ngimbambe ngoba wayezamlimaza,” kutsho uMnu Dube.
“Sasuka sahamba sayabikela usobhuku indaba le sathi sesisiyadinga umfundisi sezwa sokuthiwa kakho udlulile sokuze kulamuhla engabonakali ngitsho lomkakhe uthi kakwazi ukuthi wayangaphi njalo lecala lakhona alikathoniswa,” kutsho uMnu Dube.
Omunye wabakhonza ngaphansi kwebandla likamfundisi uMangena oziveze ngokuthi nguMaNdlovu uchaze ukuthi yena wabona kudala ukuthi umfundisi wabo kaziphathanga kuhle.
“Mina ngabona kudala ukuthi umfundisi kukhona okutshaya amanzi loMaMoyana. Ngaze ngezwa lomunye umzalwane engibuza ngakho ethi wathola uMaMoyana ehlezi endlini kamfundisi ntambama esiyadinga umkamfundisi engazi ukuthi ukoBulawayo.
“Lokhu kwangenza ngakholwa ukuthi kukhona abakwenzayo ngoba lami ngake ngabathola bebonke eguswini ngisiyatheza inkuni ngamangala ukuthi benzani egangeni kodwa kangibikelanga muntu.,” kulandisa uNkszn Ndlovu.
Ebuzwa ngale indaba uNkszn Moyana uvumile ukuthi kwenzakala wathi kakwazi ukuthi wayengenwe yini njalo uyazisola.
“Kuliqiniso sibili ukuthi ngaphambanisa lomfundisi kodwa angikwazi ukuthi ngangingenwe yini, ngiyazisola kulokho njalo lomkami ngamxolisa lakhathesi lokhe ngimxolisa. Ukuthi ngaqala kudala ukuzwana lomfundisi ngamanga,” kutsho uNkszn Moyana.
Intatheli ixhumane loMnu Moyo ecingweni othe ebuzwa ngale indaba wavuma ukuthi yenzakala wathi imzwisa ubuhlungu njalo usalindele ukuthi umfundisi aphenduke.
“Indaba enjalo ngiyayazi kodwa ingizwisa ubuhlungu ngeke ngiyikhulume, okwakathesi ngisalindele umfundisi ukuthi aphenduke lapho abaleka waya khona ukuze angitshele kuhle,” kutsho uMnu Moyo.
Online Reporter