Online Reporter
Siphathokuhle Ngulube
Salibonani bafundi. Ngithemba liyakholisa ngekhefu kodwa lingakhohlwa izifundo zenu. Okunye njalo ngithemba sihamba sonke ekuhlelweni kwephepha lenu ngendlela entsha kanti kuyilo elizabhalwa ngomnyaka ka2026.
Ngeviki ephelileyo sikhangele kakhulu isigaba sakuqala sephepha lesibili. Sigxile kabanzi kumibuzo etholakala kulesi isigaba kanye lemiklomelo ekhangelelweyo.
Kule iviki sizaqhubeka sikhangela isigaba sesibili kuphepha lesibili, (Paper 2 Section B). Lesi isigaba sigxile kakhulu kuhlelo lwesiNdebele.
Lapha kucutshungulwa kakhulu ukwakhiwa kwamagama esiNdebele atshiyeneyo.
Sikhumbule ukuthi imibuzo yohlelo idinga ukuthi ubelolwazi olujulileyo ngezihloko zonke zohlelo ngoba phela imibuzo ibuya nje kungamabala axubeneyo ayabe edinga ulwazi lwezihloko ezitshiyeneyo lokuthi uwaqambe ubuye uwakhe ngendlela ekhangelelweyo.
Kulesi isigaba kubuya imibuzo emine (4 questions).
Umbuzo owodwa ulemiklomelo engamatshumi amabili (20 marks). Kanti siphendula imibuzo emingaki lapha? Sikhangelelwe ukuphendula imibuzo emibili kuphela ezasinika imiklomelo engamatshumi amane (40 marks).
Okumele sikunanzelele yikuthi imibuzo ibuzwa njani kulesi isigaba. Umbuzo ungadinga ukuthi umfundi aqambe ukuthi amagama ayini ngohlelo lwesiNdebele.
Amagama la ande ukubuya exubene evela kuncezu zenkulumo ezehlukeneyo.
Kusobala ke ukuthi nxa ungelalwazi ngocezu lwenkulumo oluthile sekungabanzima ukuba uqambe lelobala ngendlela eqondileyo.
Omunye njalo umbuzo ungadinga ukuba uchaze ngokugcweleyo ukwakhiwa kwamagama athile avela kuncezu zenkulumo ezehlukeneyo. Lapha kudinga ukuba ibala licutshungulwe kuvele iziqa zonke ezihlanganisiweyo ukwakha lelobala. Kungadingakala futhi ukuba umfundi achaze ukuba igama linye ngalinye lisebenzeni emutshweni.
Sikhumbule ukuthi ucezu locezu lwenkulumo lulomsebenzi emutshweni.
Asithi umfundi athole igama eliyisibanjalo lidwetshwe umzila ngaphansi, umbuzo ube ususithi, “lisebenzeni leli gama emutshweni”. Isibanjalo siyalandisa emutshweni.
Zonke nje incezu zenkulumo ziqakathekile emitshweni, umfundi kufanele azinanzelele njalo abambisise umsebenzi wazo. Konke lokhu esesixoxe ngakho ngaphezulu kubalulekile kungaba ngumthelela wokungenzi kuhle nxa ungakubambanga kuhle.
Sizaqhubeka sixoxa ngezihloko zohlelo ezitshiyeneyo sikhangela ukwakhiwa kwamagama athile. Ngithemba sesikwazi okukhangelelwe kulesi isigaba. Asihlanganeni ngeviki ezayo, siqhubeka ngamaphepha ethu.
