admin
YiNtatheli kaMthunywa
ZISELE zithithibele izakhamizi zeMakokoba edolobheni lakoBulawayo ngemva kokuba enye indoda eyayilipholisa ivuke ubhova yahlahlela umngane wayo bevela ebhawa kubangwa umakhwapheni, uMthunywa uyakuveza ngokugcweleyo lamhlanje.
Impi yababili le iqalisele ebhawa yeMadlodlo ngoLwesibili ntambama lapho umetheswacala okutholakale ukuthi nguMpofu nje kuphela okucatshangelwa ukuthi engaba leminyaka ephezulu kwengu-50, owayelipholisa ehudule umngane wakhe, laye okutholakale ukuthi nguNyathi nje kuphela wayamhlahlela ngehloka phambili kweVulindlela Flats.
UMthunywa uzwe ukuthi ababili laba bebebanga isalukazi esaziwa ngokuthi nguMaSiziba esihlala khona eMakokoba njalo okuzwakale ukuthi siyakokotsha emabhawa.
UMthunywa esizwa ngalindaba uphuthume wayafika lapho okwenzakale khona insindabaphenduli le wathola kulokhu kulegazi phansi kanye lemdulwini okuveze sobala ukuthi umamangala engabe elahlekelwe ligazi elinengi nanko phela kubikwa uhlahlelwe ekhanda.
Ekhuluma lentatheli uBuhle Nyoni uveze ukuthi yena ubekhona ababili laba besilwa. Kuqalise kungani bayadonsana umetheswacala wasekhupha ihloka elincane wagamula uNyathi ekhanda ngokucwayiza kweso waphanga walifaka esikhwameni esinyamalale kwangaziwa ukuba sitshone ngaphi leso sikhwama.
“Amadoda la womabili angabangane kukhanya ebebanga umfazi yikho nje eze agamulana. UMpofu ugamule uNyathi esiphundu ngehloka qede walifihla ngoba amapholisa athe efika ihloka beselinyamalele,” kutsho uNkszn Nyoni.
Omunye wezakhamizi othande ukwaziwa ngokuthi Dumara ulandisele intatheli kaMthunywa ukuthi usuke labo ababili laba ebhawa bexabana kulapho abone khona umetheswacala esetshengisa uNyathi ihloka njalo emkhuza ukuthi katshiyane lesalukazi sakhe.
“Ngibatshiye bedonsana kuthe ngemva kwesikhathi esincane ngibone abantu sebebuthene uNyathi segomela ngapha ekhanda entshaza igazi.
“Sithe sibuza uMpofu ukuthi uselimazeleni umngane wakhe wathi uhlupho yikuthi uNyathi ulenkani kukanti isalukazi ngesakhe.
Omele isikhulumi samapholisa koBulawayo uAssistant Inspector Abednico Ncube ebuzwa ngale indaba uthe kayikafiki endlebeni zakhe.
“Kasikawutholi umbiko lo kodwa sikhuthaza uzulu ukuthi nxa kulokungezwani phakathi kwabo badinge ezinye indlela zokukhumisana umlotha hatshi ukulwa,” kuphetha uAsst Insp Ncube.
Online Reporter