Online Reporter
Nkosilathi Sibanda
SELIVALELWE phakathi ipholisa leFigtree, esabelweni seMatabeleland South okubikwa lancedisa ukutshontsha inkomo ezifika-18.
Ipholisa leli uTafara Sibanda (44) lenza lelicala liloDaniel Dube (38) loMaxwell Ncube (33). Bobathathu bamiswe phambili kukaMantshi emthethwandaba wePlumtree.
Batshontsha inkomo lezi ngoNcwabakazi eKirby Block Farm.
Kubikwa uSibanda, olilunga leZimbabwe Republic Police wenza ubungilimbane ngokuvumela ukudluliswa kwalezinkomo, ebhala kuForm 22 yamapholisa kunye lokudinda amaphepha e-Veterinary Services.
“Inkomo zahanjiswa e-Acacia Abattoir koBulawayo lapho ezahlinzwa khona. Abanikazi balezinkomo banengi. Ezimbili ngezomunye umlimi oleminyaka engu-67 yokuzalwa, eziyisithupha ngezomunye njalo oleminyaka engu-75, ezintathu ngezesakhamuzi esileminyaka engu-33 yokuzalwa. Ezinhlanu ngezelizwe,” kubika iNational Prosecuting Authority of Zimbabwe.
“Uphenyo lwecala leli lwaqalisa mhlaka 1 Mpandula kulandela ukubikelwa kwamapholisa, afika kwenye inkampani yezikhumba koBulawayo. Abanikazi benkomo bananzelela ukuthi izikhumba ngezenkomo zabo ngenxa yezimpawu. Inani lentengo yenkomo lezi ingafika iUS$5 400. Ukuthethwa kwecala kuqhubeke mhlaka 30 Mpandula.”
