Online Reporter
Peter Matika
AMAPHOLISA abopha abantu abanga yisibo kucala lokutshontshwa kwe-US$4 million, nanko kuvele emthethwandaba ukuthi amapholisa enza iphutha elikhulu, eliyangisayo.
Amapholisa abopha uSibonginkosi Sibanda loThokozani Zulu, abamiswe emthethwandaba kamantshi koBulawayo ngoLwesihlanu ngehola lesine ntambama
Izizalwane zakuleli besezilinde ukuzwa ngempumela yokuthethwa kwecala, ikanti amapholisa adlale ngenkundla nje, esetshintsha ukuphawulwa kwecala leli, esithi uSibanda loZulu babotshelwa ukubolekisa imali, hatshi ukutshontsha ebhanga behlomile.
UZulu wesulwe yonke insolo ayetheswe ngamapholisa, uSibanda oyisisebenzi seSafeguard, wetheswe icala lokubolekisa imali njalo ukhangelelwe ukumiswa phambili kukaMantshi ngoMvulo ekuseni, ukuzwa ngesimo sebheyili.
Amadoda womabili ebemelwe ligqwetha uPrince Bhutshe-Dube oweBhutshe and Associates.
Igqwetha libeke umbuzo kupholisa eliphenye udaba uDetective Assistant Inspector Tawedzerwa Shiriyapenga, osuke waxhamanda, wehluleka ukuphendula imibuzo.
Ubuzwe ukuthi kungani icala selitshintshiwe, njengo kulotshwe ku-affidavit.
“Ekuqaleni uthe kawuba bophelanga ukweba behlomile. Kodwa, i-affidavit yakho itshengisa ukuba abasolwa babizelwa ukubuzwa ngecala lokweba. Ubufihla iqiniso kumbe?” kubuza ingqwetha.
UShiriyapenga uthe kwaba liphutha ngesikhathi bebhala ngecala.
Igqwetha liphinde labuzisisa, kwavela ukuthi uShiriyapenga wenza inkalakatha yephutha.
UShiriyapenga utshele inkundla ukuthi uSibanda wathenga impahla lezakhiwo ezinengi, ezinye ziphansi kwebizo lomkakhe lendodana yakhe.
“Utsho ukuba owesifazane otshadileyo kavunyelwa ukuba lempahla?” kubuze igqwetha.
Izakhiwo lempahla okukhulunywe ngazo kugoqela indlu eCowdray Park, enye eMbundane lemizi emibili, imota yohlobo lweHonda Fit leHino.
Igqwetha liqhubeke lagcona indlela uShiriyapenga ethule ngayo insolo yakhe emthethwandaba.
“Kawulungelanga ukuphatha loludaba. Kawuzange uqeqetshe ngokufaneleyo umsebenzi njalo wenze ingxabangxoza. Uyazwisisa ukuthi ukubolekisa imali kutshoni? Uyayazi iCommercial Crimes Division? Yibo abaphatha indaba ezinje, hatshi wena,” kutsho Bhutshe-Dube.
