Online Reporter
Nkosilathi Sibanda
UMDLALO kanobhutshuzwayo kuligi yeZifa Division One emhlubulweni ongezansi yelizwe kawukho lula, kodwa umsekeli kamqeqetshi weqembu leNkayi United uChipo Tsodzo ubika ukuthi bazalwela ukuthi babuse kuze kuyo valwa isizini.
UTsodzo ukhulume kanje kulandela ukuqansa kweNkayi United kungalane yamaqembu akuligi le. Uthe inhloso yabo yikuthi bafinyelele iPremier Soccer League.
“Sihamba ngegiya eliphezulu kulumkhankaso kuDivision One. Kukho konke, silapha ngoba sikhangelele okukhulu, okuyikunqoba sifike kuPSL. Siyazi mhlophe ukuthi wonke amaqembu ahlose okufanayo, ngakho sizazama ukuthi sihlale siphezulu lanxa sisiwa, sizavuka futhi,” kutsho uTsodzo.
Ngempelaviki edluleyo iNkayi United inqobe iBosso 90 nge 3-1, emdlalweni obusenkundleni yeWhite City koBulawayo. Ngemva kwemidlalo engu-13, iNkayi United sithole imiklomelo engu-28. Isihlohle amabhola angu-20, yahlohlwa ayisithupha.
Isinqobe kumidlalo eyisitshiya galombili, yanqotshwa kanye.
Ikhokhela ingalane kuliviki, ilandelwa yiBulawayo Chiefs elemiklomelo engu-27.
Loba uTsodzo labanye ebhentshini labaqeqetshi beNkayi United bezitshaya isifuba, uthe nxa bekhangele isimo sengalane yamaqembu, bakubona ukuthi balomthwalo lomncintiswano onzima, ikakhulu kumaqembu agoqela iChiefs, Hwange, leBlackRock.
Kusenjalo, phakathi laphakathi kwengalane, iBulawayo City ihlezi kunombolo yesitshiya galombili ilemiklomelo engu-19, ilandelwa yiCasmyn leMegawatt eziphethe imiklomelo efanayo. Emsileni wengalane kulabafundi benyuvesi yeNust balemiklomelo eyisithupha kuphela, njalo lokhe kwavulwa isizini sebenqobe umdlalo owodwa.
Kweminye imidlalo ebikhona ngempelaviki, iBulawayo Chiefs idlale yalingana leHwange nge 1-1. Abafana abaphuma edolobheni lemalahleni, iBlackrock banqobe iMbizo besemangweni nge 1-0.
Iqembu leMainline linqobe nge 1-0 kuJordan Sinnot.
Impumela yemidlalo ngokugcweleyo:
Bosso 90 1-3 Nkayi United, Bulawayo Chiefs 1-1 Hwange, Megawatt 0-0 Victoria Falls Herentals, Jordan Sinott 1-2 Mainline, Casmyn 0-1 Talen Vision, Nust 0-0 Bulawayo Warriors, Zebra Revolution 2-0 Bulawayo City, Imbizo 1-0 Blackrock, Jordan 1-2 Mainline
Isiphetho…
