Online Reporter
Zimpapers Sports Hub
SEKUHLOHLWE amabhola angamakhulu amabili kumidlalo yeligi yeCastle Lager Premiership ngemva kwemidlalo elitshumi lane.
Iligi le ithathe ikhefu kulimpelaviki, ngenxa yokuthi kulemidlalo yamaWarriors. Iqembu lelizwe lilemidlalo yobungane leBurkina Faso leNiger, kuthi elinye iqembu njalo likumncintiswano wenkezo yeCosafa.
Umdlali weKwekwe United uTafadzwa Muzenda uhlohle ibhola lesi-200 ngesikhathi bedlala leGreenfuel enkundleni yeBata ngeSonto. Kube ngumdlalo lapho uClive Rupiya ahlohle khona ibhola lesi-201.
Phambi kwemidlalo yangeSonto, besekuhlohlwe amabhola angu-193.
Asebekhokhela ngokuhlola amabhola amanengi ngumdlali weMWOS uBilly Veremu loWashington Navaya oweTelOne. Bobabili sebehlohle ayisitshiya galolunye.
UVeremu uhlohle ibhola elilolwa benqoba iScottland nge 1-0 enkundleni yeNgoni, eNorton. Kumidlalo engu-126 esidlaliwe, engu-51 iphethe kungutshiki lobhanqa.
Iqembu lamaWarriors elikuCosafa ligcwele abafana abasakhulayo kulumncintiswano oqale ngoLwesithathu, usiyaphela mhlaka 15 Nhlangula.
Kusenjalo, umqeqetshi weFC Platinum uNorman Mapeza uthe uzasebenzisa ithuba lekhefu ukuthi alolonge abadlali bakhe okuzwayo.
Iqembu leZvishavane leli lilemiklomelo engu-20 njalo batshiyane ngemiklomelo elitshumi leMWOS ekhokhela ilogu.
“Besikhangelele ukuthi sinqobe imidlalo yethu, silemidlalo eminengi esaqeda kungutshiki lobhanqa,” kutsho uMapeza ngemva kokunqoba iTelOne.
“Kubeyintokozo enkulu, ngabika ngiseHarare ngenye imini ukuthi ngendlela esidlala ngayo singanqoba kumbe sehlulwe.”
Impumela yemidlalo ngeviki edluleyo:
Dynamos 0-0 Highlanders, Kwekwe United 1 Greenfuel 1, ZPC Kariba1 Yadah 0, Herentals College 0 Bikita Minerals 2, Telone 0-1 FC Platinum, Manica Diamonds 0-1 CAPS United, Simba Bhora 0- Ngezi Platinum Stars 0, MWOS 1 Scottland 0
