Online Reporter
Ethel Ncube
BATHABE bamanzi te abeqembu laMakholwa eNkosi abahlabela umculo wezokholo kulandela ukuthola isicoco kumsakazo weMzansi Afrika.
Iqembu la-Amakholwa eNkosi lithethe isicoco sokuqala kumqhudelwano wengoma zokholo kumsakazo waMaqhawenentaba kumaviki asanda kudlula.
Ekhuluma lentatheli umsunguli weqembu leli, uDelight Ncube ubike ukuba balokujabula ngesicoco abasamukeleyo.
“Siyathokoza ngoba indondo ibuye ekhaya. Kuyisibusiso esikhulu kithi lokho. Kwakungelula ukuncintisana labanye abaculi kodwa ngomusa ingoma yethu ethi; Uphehla amanzi amnyama yenza sathola isicoco.
“Isicoco lesi siveza ukuba iqembu lethu liyakhula njalo kusipha umdladla wokusebenza nzima kwezomculo,” kubika uNcube.
Uqhubekele phambili eveza ukuba wethula isibongo kubalandeli abaqhubeka ngokubasekela.
“Sithanda ukubonga abalandeli bomculo wethu ngoba bayasiphakamisa. Sizingqwele zomculo wezokholo nje lamuhla ngenxa yabo, sithanda ukubabonga kakhulu ngokusisekela abakwenzayo.
“Ngifisa ukubonga njalo labomsakazo lo ngokusiqoqela umcimbi wokusiphakamisa,” kutsho uNcube.
