Online Reporter
Ethel Ncube
IQEMBU le-Inkululeko Yabatsha School of Arts lethekele eGermany lapho elimenywe khona ukuzolingisa umdlalo walo.
I-Iyasa izahlala eGermany amaviki amabili idlala umdlalo walo othi ‘How is the weather/ Wie Das Wetter.
Intatheli ixhumane lomqondisi weqembu leli uNkululeko Dube oveze ukuba base-Germany lapho abamenywe khona.
“Simenywe liqembu le Germany okuthiwa yiTheatre Strahl esisebenzisana lalo. Umdlalo wethu othi ‘How is the weather’ sawuqalela koNtuthu ngo2023 lapha eGermany sesibuya okwesibili ukuzodlala umdlalo lo ngemva kokuba i-Germany iwuthakazelele umdlalo lo,” kubika uNkululeko.
Ubuye waveza ukuba umdlalo lo ukhangela ngokuguquka komumo womkhathi.
“Umdlalo lo ukhangela ngokuguquka komumo womkhathi osekuhlukumeze abantu. Silapha nje eGermany sizobukisa indlela umumo womkhathi ohlukumeza impilo kazulu njalo lokungenziwa ngokuguquka komumo womkhathi.
“Sibonga iGermany ngokusipha ithuba lokuzobukisa ubungcitshi bethu bezokulingisa,” kutsho uNkululeko.
