Online Reporter
Lovemore Dube
IQEMBU lezibotshwa ezidlala inguqu ejele leKhami Prisons selingaphansi kweBulawayo Social Soccer League njengengxenye yokuvuselela lokubuyisela izibotshwa emphakathini.
Lokhu kulandela inyathelo lwe-Zimbabwe Prisons and Correctional Services elokuthi izibotshwa zincediswe ukuguqula impilo, zilungise amaphutha azo ukuze ziphenduke zibe lomlandu emphakathini.
Isiphathamandla seBulawayo Metropolitan Province Commanding for the Zimbabwe Correctional and Prison Services, uMkhulunyelwa Ngwenya, utshele iZimpapers Sports Hub ukuthi ibhola likanobhutshuzwayo libalulekile ekuvuseleleni lobuyisela izibotshwa emphakathini.
“Njengenhlangano sesiguqukile sisuka endleleni yokujezisa ebesiyijwayele, sasebenzisa indlela yokuguqula izimilo zezibotshwa. Siyakubona ukuthi nxa sithatha umzila lo sifuna kube lesibotshwa esiphuma sifuna ukuthuthukisa umdlalo lo othandwa kakhulu,” kutsho uNgwenya.
Uthe ukudlala kuBulawayo Social Soccer League kuvumela izibotshwa ukuthi zithole ukuthakazelela impilo yangaphandle kwejele, zilungiselele ukuthi zibuyele emphakathini.
“Sesibhalise iqembu lezibotshwa kuBulawayo Social Soccer League. Lokhu kuyingxenye yomsebenzi wethu wokuvuselela lokubuyisela izibotshwa emphakathini. Balungiselela impilo entsha kancane kancane.
“Amajele ethu sebizwa ngokuthi zindawo lapho izibotshwa eziguqula khona impilo kwelingcono. Inyathelo selibe yimpumelelo njalo sisebenza ndawonye lenhlanganiso ezibalisela iCity Football Development Trust,” kutsho uNgwenya.
