Online Reporter
Peter Matika
KUBE yisimaye maye eNyaradzo Funeral Parlour, koBulawayo izolo ngesikhathi umdeni wepholisa elabulawa ngokudutshulwa uConstable Cassandra Hove, idinga ukuchasiselwa lokuthola iqiniso ngokwenzakalayo.
Imuli le, ithe ikholwa ukuthi uHove kazange abulawe yizigebengu, kodwa ngomunye abasebenza bonke.
U-Const Hove wabulawa ngokudutshulwa lapho yena lamanye amapholisa begijimisa izigebengu elokitshini lePumula South koBulawayo, ngoLwesine ebusuku ngeviki edluleyo.
Isehlakalo lesi senzakale ngehola lesitshiya galolunye, endaweni ebizwa ngokuthi kuseHabek.
Inkonzo yokuvalelisa umuyi ebihlelwe ukuthi ibekhona ngehola letshumi ekuseni ngeSonto, eNyaradzo Funeral Parlour isuke yedluliselwa phambili ngenxa yengxabano esuke yabakhona kumalunnga omdeni, edinga ukuzwisisa emapholiseni akade ekulinkonzo.
Abemuli baveze ukuthi bavimba ukukhitshwa kweqiniso mayelana ngokufa kwesihlobo sabo.
Bathe bafuna ukwazi njalo amabizo amapholisa ayesebenza lomuyi ePumula South mhla welanga lesehlakalo lesi kunye lokuthi ngubani owavumela ukuthi kuhlolwe isidumbu esibhedlela imuli ingatshelwanga.
“Kukhona okusolisayo ngakho konke lokhu. Kungani amapholisa ajaha ukuyahlola isidumbu ngaphandle kwemvumo yethu?” kutsho owesifazane ongelinye ilunga lomdeni.
“Kungani bebeqoqa imali yemfa thina singazi? Bayisa ngaphi leyo mali?
“Nxa izikhalazo zethu zingakhangelwanga, bangahle bazingcwabele ngokwabo. Amapholisa kumele aziphendulele, ngeke siyekele ukuba lemibuzo size sisuthiseke,” kutsho limuli.
Okhulumela imuli le, uMnumzana Ryan Gambinga, uthe batshaqeke kakhulu njalo bakhathazekile ngesimo esibuhlungu ngokufa kukaHove.
“Lanxa siqale sathola imibiko engazwisisekiyo, umhlangano wethu le-ZRP Bulawayo iqinisekise ukuthi omunye wamapholisa, hatshi izigebengu, nguye owadubulayo,” kutsho uMnu Gambinga.
UMnu Gambinga uthe umdeni uzathola ukuthula nxa kungenziwa uphenyo oluzaveza iqiniso elipheleleyo ukuze udaba lufinyelele emaphethweni.
“Esikuzwileyo kubisa imibuzo eminengi njalo kuyasidabula kakhulu. Sizimisele ukuveza iqiniso elipheleleyo lokuqinisekisa ukuthi kusetshenziswe umthetho ngendlela efaneleyo,” nguMnu Gambinga lo.
Ukungezwani phakathi kwamapholisa lemuli kuze kwaphela ngehola lesithathu emini.
“Siqhubeke ngenkonzo ngemva komhlangano lamapholisa. Basithembise ukuthi bazakwenza uphenyo kulolu daba. Sekukibo ukuthi bagcwalise isithembiso sabo,” kubika uMnu Gambinga.
Uthe balusizi ekuthini labo abaphakathi kodaba bayehluleke ukuziveza emulini.
“Kungaba kuhle ukuthi bakhulume lathi. Kumele kwenziwe njalo, njengoba kusenziwa kumasiko amanengi. Silemibuzo okumele iphendulwe.”
UMnu Gambinga ubike ukuthi umuyi ubesethole i-scholarship sokuyaqhuba izifundo ze-forensic investigations eRussia.
“Besesiqoqe wonke amaphepha akhe njalo besisezihlelweni lokuthola imali. Kubuhlungu ngempela lokhu,” kutsho uMnu Hove.
Kunkonzo yokuvalelisa umuyi, labo akade esebenza labo kugatsha lwe-Criminal Investigations Department Homicide, eyaziwa ngokuthi yi-Lozikeyi bebengekho.
Osabambe isikhundla sesikhulumi samapholisa koBulawayo u-Assistant Inspector Nomalanga Msebele udlulisele yonke imibuzo kusikhulumeli samapholisa elizweni lonke u-Commissioner Paul Nyathi yena ongatholakalanga ngesikhathi edingwa ukuthi akhulume ngodaba.
UHove utshiye abantwana abane. Ungcwatshwa lamuhla eMberengwa.
