Online Reporter
Ethel Ncube
BEKUNGABIZWA ozwayo eMguza ngempelaviki lapho iqembu leZimnyama ebelijabulisa khona ligida kuvungame amadoda.
Umqondisi weqembu leli uPhibion Ncube ubike ukuba bayajabula kakhulu ukuphiwa ithuba lokuzahlanganyela lomphakathi emakhaya.
Ekhuluma lentatheli, uNcube uveze ukuba ithuba lokuba banxuswe emicimbini lenza baziwe ngabantu.
“Siyajabula ukuba sithole ithuba lokuba sinxuswe emicimbini enjangale, lathi sizojabula lezakhamizi sibatshengisa esidume ngakho.
“Ngijabule kakhulu ngesikhathi bengena esitikini bevunule impahla zabo. Kulinyanga ngibone abantwana labadala betshengisela ukuthaba okuveza ukuthi bayakuthakazelela esikwenzayo,” kutsho uPhibion.
Ubuye waveza ukuba ubonga kakhulu ngokuphiwa ithuba.
“Ngethula isibongo kuzulu wonke obuye embuthanweni lo wazobona imisebenzi yethu. Ngibonge losekelo esiluthola ebantwini ukusibiza ukuba sizochitha labo isizungu sijabulisa uzulu emicimbini. Lokhu kuyisibusiso esikhulu kakhulu kithi leqembu lethu.
“Okunye engifisa ukukwethula kuzulu yikuthi zikhathi zonke sihlala silungiselela ukuze konke esikwenzela uzulu labalandeli kube sezingeni eliphezulu njalo elilohlonzi. Abafisa ukwazi lapha abangasithola khona bangasidinga kukhasi lethu leFacebook elibhalwe Ezimnyama Dance Zimbabwe.
“Yonke imininingwane bayithola ukuthi baxhumane lathi sizojabulisa loba ngaphi,” kuphetha uNcube.
