Izandiso ezivela kwamanye amabizo ngezigaba zawo
Sitshengise lokhu ngezigaba ezithile kulokhu ngaphansi kwesigaba, ibizo lesandiso sendawo kanje: Kusigaba 7 ibizo isilo, isandiso sendawo ngu-esilweni. Kusigaba 8 ibizo ngu-izilo, isandiso sendawo ngu-ezilweni.
Kusigaba 9 ibizo ngu-inja, isandiso sendawo ngu-enjeni. Kusigaba 11 ibizo ngu-uluthi, isandiso sendawo ngu-eluthini. Kusigaba 14 ibizo ngu-ubuhle, isandiso sendawo ngu-ebuhleni. Kusigaba 15 ibizo ngu-ukona, isandiso sendawo ngu –ekoneni.
Nanku esikuphawulayo kugoqela izigaba esixoxe ngazo kuviki edlulileyo: Unkamisa osekuqaleni siyamguqula kuwo wonke amabizo.
Nxa sisakha isandiso sendawo siqalisa ngonkamisa -e- kuzo zonke izigaba ngaphandle kwesigaba 1a lesigaba 2a. Zona-ke ziqalisa ngo-ku.
Nxa sihlolisisa izandiso lezi sizabona ukuthi kulenguquko eyenziwe ekucineni kwebizo kuzo zonke izigaba ngaphandle kwesigaba 1a lesigaba 2a.
Wonke amabizo acina ngo –a loba –e ajobelela u-eni esikhundleni sabonkamisa laba. Endaweni kankamisa –i osekucineni kwamabizo athize sijobelela u-ini.
Amabizo acina ngo-o ajobelela u-weni nxa esakha izandiso zendawo. Endaweni kankamisa –u osekucineni sijobelela u-wini.
