Online Reporter
Izandiso ezivela emagameni emifula ngaphansi kwebizo lesandiso sendawo. Ibizo – uMzingwane – isandiso sendawo – kuMzingwane; uGweru – kuGweru; uTshangane – kuTshangane; uGwayi –kuGwayi; uThuli – kuThuli; uTshatshane – kuTshatshane; uManzamnyama –kuManzamnyama.
Isakhi ku- sithatha indawo kankamisa wokuqala webizo. Kodwa uma sikhomba indawo ebizwa ngalowomfula isandiso sendawo sakhiwa kanje: Ibizo –uMzingwane, isandiso sendawo –eMzingwane; uGweru –eGweru; uTshangane –eTshangane njalonjalo.
Unkamisa wokuqala webizo uthathelwa indawo ngu-e.
Ezivela emabizweni ezintaba. Ibizo iWozoli –eWozoli, iMavule – eMavule, uMtshelanyemba –eMtshelanyemba; iMtshaphi – eMtshaphi.
Unkamisa wokuqala webizo uthathelwa indawo ngu-e.
Izandiso ezivela kwamanye amabizo ngezigaba zawo. Kusigaba 1 ibizo umfana, isandiso sendawo ngu-emfaneni. Kusigaba 1a ibizo ngu-ubaba, isandiso sendawo ngu-kubaba; kusigaba 2 ibizo abantu isandiso sendawo ngu-ebantwini. Kusigaba 2a ibizo ogogo, isandiso sendawo ngu kubogogo.
Kusigaba 3 ibizo ngu-umuthi, isandiso sendawo ngu-emuthini; Kusigaba 4 ibizo ngu imithi, isandiso sendawo ngu-emithini. Kusigaba 5 ibizo ngu –ilizwi, isandiso sendawo ngu-ezwini; Kusigaba 6 ibizo ngu-amazwi, isabizwana sendawo ngu- emazwini.
Kusigaba 7 ibizo ngu-isilo, isandiso sendawo ngu-esilweni . Lokhu sikuqhuba ngeviki ezayo.
