admin
Cornelius Luphahla
INGQUNGQUTHELA kwezamaqembu ezesiNtu ezokuzithokozisa aphuma koBulawayo iSekunjalo Ma-Africa ifunga iyemba phansi ithi inkezo yeChibuku lonyaka ngeyayo.
Leliqembu lifunga nje ngemva kokunqoba wonke amaqembu alitshumi akoBulawayo ayekhona emncintiswaneni weChibuku NeShamwari obukhona emavikini amabili adluleyo eSigodini ngakho lithi selifuna inkezo yeChibuku okuzaba lomncintiswano wayo kuviki ezayo.
Umholi waleliqembu leSekunjalo uArnold Ndebele uveze ukuthi lonyaka uthembisa uzulu ukuthi inkezo le izasala koBulawayo ngoba sebehlome baphelela.
“Noma nje kumnyaka ophelileyo singenzanga kuhle kodwa lonyaka njengeqembu elimele uBulawayo siyathembisa ukuthi inkezo yeChibuku NeShamwari izasala lapha koBulawayo ngoba yikho okwenza simele uBulawayo. Ngitsho lokhu ngoba sesihlome saphelela sihlomela umkhosi lo ngakho kakho ongasehlula ngoba siyibambe sidukwini.
“Njengoba nje kumnyaka ophelileyo inkezo le ithethwe yiMashonaland East lonyaka sithi phakathi kwelizwe lonke leZimbabwe thina sizatshengisa ubungcitshi bethu nxa kuvuma langaphandle kwelizwe sizahamba siyenqoba futhi,” kutsho uArnold Ndebele.
Omunye wamalunga aleliqembu leSekunjalo uNkosilathi Banda uchaze ukuthi bakhangelele ukuthi inkezo le bayithathe minyaka yonke kusukela lonyaka kusiya phambili.
“Inkezo le sikhangelele ukuthi singayithatha lonyaka ihle ingasasuki koBulawayo minyaka yonke. Esingakuthandiyo yikuthi kuthiwe sibe ngabesibili kunkezo le kodwa sifuna yona ngokwayo. Ngalokhu lonyaka sifuna ukuvezela uMthwakazi ukuthi isipho somculo kanye lemigido yesiNtu kukhona lapha koBulawayo ngakho kufanele singazeyisi.
“Ukuthatha kwethu inkezo kuzadala ukuthi wonke umuntu olesiphiwo kwezokuthokozisa uzulu ophuma lapha koMthwakazi aphakame avezele uzulu isiphiwo sakhe,” kuphetha uNkosilathi Banda.
Online Reporter